![](img/news/29/04/15/default.jpg)
Եգիպտոսի դատարանը երկուշաբթի որոշել է սպառված համարել նախկին նախագահ Հոսնի Մուբարաքի որդիների պատժի ժամկետը եւ ամբողջովին մարել այսպես կոչված «Պալատների գործով» նրանց պատիժը, որի շրջանակներում Մուբարաքի որդիները դատապարտվել էին 3 տարվա ազատազրկման։ Այս մասին հայտնում է «Ալ Ահրամ» կայքը։
Ավելի վաղ փաստաբանը դատարանին հայտնել էր, որ իր պաշտպանյալները ազատազրկման մեջ 3 տարուց շատ են անցկացրել։ Նա նշել է, որ ազատազրկման ժամկետը 6 ամիս 18 օր առաջ է լրացել, եւ պահանջել է ազատել Եգիպտոսի նախկին նախագահի որդիներին, փոխանցում է «ՌԻԱ Նովոստի»-ն։
Կահիրեի քրեական դատարանը այս տարվա մայիսի 9-ին Եգիպտոսի նախկին նախագահ Հոսնի Մուբարաքին եւ նրա որդիներ Ալիին ու Գամալին դատապարտել էր երեք տարվա ազատազրկման նախագահական նստավայրերի համար հատկացված պետական գումարները յուրացնելու համար։
Փաստաբանը վճռաբեկ դատարան բողոք էր ներկայացրել՝ իր պաշտպանյալների նախնական կալանքի տակ անցկացրած ժամկետը պատժամիջոցի մեջ ներառելու համար։