Մոսկվայում Եվրասիական տնտեսական համագործակցության անդամ երկրների լիազոր նախարարությունների եւ տեսչությունների ներկայացուցիչների խորհրդակցությանը, որը տեղի է ունեցել ԵՏՀ Էներգետիկայի եւ ենթակառուցվածքների հարցով Կոլեգիայի անդամ (նախարար) Թաիր Մանսուրովի նախագահությամբ, քննարկվել են համաձայնեցված տրանսպորտային քաղաքականության ուղղություններն ու փուլերը։ Ինչպես NEWS.am-ին հաղորդել են ԵՏՀ-ի մամուլի ծառայությունից, Ղազախստանի մշակած փաստաթուղթն առաջին անգամ դրվել է Կողմերի քննարկմանը։
Հիմնական ուղղությունները, որոնք պիտի ընդունվեն 2016 թվին, կնպաստեն միասնական տրանսպորտային տարածքի եւ ԵՏՄ տրանսպորտային ծառայությունների ընդհանուր շուկայի ձեւավորմանը։
Խորհրդակցության մասնակիցները քննարկել են ավտոմոբիլային, ջրային, օդային տրանսպորտի, ինչպես նաեւ տրասնպորտային ենթակառուցվածքի եւ տարանցիկության ներուժի իրացման եւ տրանսպորտի ոլորտում գիտա-կադրային ապահովման վերաբերյալ համաձայնեցված քաղաքականության սկզբունքային հարցեր։
Կողմերը համաձայնեցրել են փաստաթղթի կառուցվածքը, հավանություն են տվել դրա համաձայնեցման եւ ընդունման միջոցառումներին, ինչպես նաեւ պրոֆիլային Աշխատանքային խումբ են ստեղծել, որի առաջին նիստը նախատեսված է 2015-ի նոյեմբերին։