![](img/news/29/07/16/default.jpg)
Ռուսաստանում ադրբեջանցի համառ Ռոմեոյի անառողջ կրքի զոհը 19-ամյա հայուհի է դարձել։ Տղամարդը աղջկան դանակահարել է Մոսկվայի մետրոյի «Օտրադնոե» կայարանի մոտ, փոխանցում է «Մոսկովսկի կոմսոմոլեց»-ը։ Սպանված Աննան (բոլոր անունները փոխված են) սովորում էր Ռուսաստանի Պիրոգովի անվան բժշկական համալսարանում։ Նրա շուրջբոլորը մշտապես պտտվում էր ոչ ադեկվատ վարքով 19-ամյա մի ադրբեջանցի՝ Էդիկը, որը սովորում էր ՌԴ ՊՆ Ռազմական ուսումնարանի 3-րդ կուրսում։
Աղջիկն ու տղան հանդիպում էին դպրոցում, սակայն հետո Աննան որոշել էր վերջ դնել հարաբերություններին, իսկ Էդիկին դա դուր չէր եկել, եւ նա պարբերաբար փորձում էր իր աննորմալ վարքով արժանանալ աղջկա ուշադրությանը։
Նա մշտապես հետեւում էր աղջկան, սպառնում ուժ գործադրել։ Աղջկա հայրը բազմիցս հանդիպել էր տղայի մոր հետ՝ իրավիճակը պարզելու համար, սակայն կինը նույնպես հեռու է եղել ադեկվատ վարք դրսեւորելուց. նա ասել էր, որ նորմալ է համարում իր տղայի արարքը։ Ըստ որոշ տեղեկությունների՝ աղջիկն ու նրա հայրը մի քանի անգամ դիմում են գրել ոստիկանություն, սակայն քննիչները հանցագործության տարր չեն գտել տղայի արարքում։
Երկրպագուի հետապնդումներն ավարտվել էին հոկտեմբերի 12-ին՝ ժամը 19։00-ին։ Երեկոյան տուն վերադառնալիս Աննան հաղորդագրություն էր ուղարկել հորը, որպեսզի վերջինս դիմավորի իրեն։ Սակայն աղջկան դիմավորելու դուրս եկած հայրը Խաչատրյան փողոցի 16 տան մոտ գտել էր դստեր մարմինը։ Նախնական վարկածի համաձայն՝ աղջկան մետրոյի մոտ դիմավորել էր ադրբեջանցի երիտասարդը՝ իր ընկերների հետ, տարել նրան մի կողմ եւ տեղի ունեցած զրույցից հետո դանակի մի քանի հարված հասցրել աղջկա որովայնին։ Հայրը ցանկացել է ինքնադատաստան տեսնել տղայի նկատմամբ։ Կասկածյալը ձերբակալված է։