Ուկրաինայում մալայզիական ավիաընկերության օդանավի վթարի հետեւանքով զոհված Մալայզիայի քաղաքացիների ընտանիքները պահանջում են դատել ողբերգության մեղավորներին, հայտնել է «Բերնամա» մալայզիական պետական լրատվական գործակալությունը:
Գործակալությունը մեջբերում է վթարի հետեւանքով զոհված Մալայզիայի քառասուներեք քաղաքացիներից իննի ազգականների խոսքը: Գործակալությունը նրանց կարճ հարցազրույցներն էր ձայնագրել երեքշաբթի՝ վթարի հետաքննության արդյունքների մասին Նիդեռլանդների անվտանգության խորհրդի զեկույցի հրապարակումից հետո:
Malaysia Airlines ավիաընկերության վթարի ենթարկված օդանավում մալայզիացի 28 ուղեւոր կար ու անձնակազմի 15 անդամ, հայտնում է «ՌԻԱ Նովոստին»:
Զոհվածների բոլոր այն ազգականները, որոնց հարցաքննել էր գործակալությունը, պահանջում են ավարտին հասցնել վթարի փաստով քրեական հետաքննությունը ու մեղավորներին պատասխանատվության կանչել:
Վթարի հետեւանքով զոհվածների հարազատներն ընդհանուր առմամբ բավարարված են Նիդեռլանդների անվտանգության խորհրդի հետաքննության արդյունքներով, սակայն նրանք բոլորը պահանջում են արագացնել քրեական հետաքննությունը, որը կարող է պատասխանել այն հարցին, թե ով ու ինչու է քաղաքացիական օդանավի վրա ՀՕՊ հրթիռ արձակել:
«Ես համակարպվել եմ կատարվածին: Ամուսնուս վերադարձնել այլեւս հնարավոր չէ: Բայց կարելի է ու պետք է պատժել նրանց, ովքեր արձակել են այդ հրթիռը»,- գործակալությանն ասել է Մարիամ Յուսոֆը՝ МН17 չվերթի հրամանատար, կապիտան Վան Ամրանի այրին:
«Մենք՝ զոհվածների հարազատներս ու ազգականներս, ուզում ենք, որ այդ հրթիռն արձակողները ու կազմակերպիչները գտնվեն ու պատասխանատվության կանչվեն: Մենք համարում ենք, որ արդարությունը պետք է հաղթանակի»,- ասել է նա: