Նախորդ տարվա օգոստոսի համեմատ՝ 2015թ. օգոստոսին Հայաստանում էժանացել է հացամթերքը, մսամթերքը, սուրճը, կակաոն, ալկոհոլային խմիչքները: Այս մասին այսօր՝ հոկտեմբերի 14-ին, լրագրողների հետ հանդիպմանն ասաց Ազգային վիճակագրական ծառայության գների Վիճակագրության և միջազգային համադրումների բաժնի պետ Գուրգեն Մարտիրոսյանը:
«2015թ. առաջին եռամսյակում արձանագրվել է 2,3% գնաճ, 2-րդ եռամսյակում՝ 2.3% գնանկում, իսկ վերջին եռամսյակում՝ 2% գնանկում: Սեպտեմբերին գրանցվել է 0,1% գնաճ. պարենային ապրանքների գները մնացել են անփոփոխ, ոչ պարենային ապրանքատեսակները թանկացել են 0.6%-ով: Եթե համեմատենք նախորդ տարվա օգոստոսի հետ, ապա թանկացել են բանջարեղեն-կարտոֆիլային խումբը, ոչ ոգելից խմիչքները: Դրան հակառակ էժանացել են հացամթերքը, մսամթերքը, ծխախոտը, սուրճը, կակաոն, ալկոհոլային խմիչքները, շաքարավազը, միրգը»,- ասաց Գուրգեն Մարտիրոսյանը:
Մասնագետի խոսքով՝ 9 ամսվա կտրվածքով 13 ապրանքախմբերից 5-ում գնաճ է արձանագրվել, իսկ մյուս 8-ում՝ գնանկում, այդ թվում բանջարեղեն-կարտոֆիլային խումբն էժանացել է 32,7 տոկոսով, ձուն՝ 25,9 տոկոսով, ձկնամթերքը՝ 14,1 տոկոսով, միրգը՝ 12 տոկոսով, շաքարավազը՝ 10 տոկոսով. «Այս ժամանակահատվածում թանկացել են հացամթերքը, սուրճը, թեյը, կակաոն, ոչ ոգելից խմիչքը»:
Նախորդ տարվա սեպտեմբերի համեմատ՝ ապրանքնատեսակները թանկացել են 3,3 տոկոսով: Ինչ վերաբերում է կուտակային ցուցանիշին, ապա նախորդ տարվա նույն ժամանակահատվածի համեմատ՝ արձանագրվել է 4,7 տոկոս գնաճ, այդ թվում` պարենային ապրանքները թանկացել են 4,9 տոկոսով:
«Թանկացել են սմբուկը, կանաչ սոխը, լոլիկը, սխտորը, իսկ էժանացել են գազարը, կարտոֆիլը, գլուխ սոխը, պղպեղը: Եթե համադրենք նախորդ տարվա սեպտեմբերի հետ, ապա բանջարեղենը բավականին թանկացել է. կաղամբը` 49 տոկոսով, կարտոֆիլը` 24 տոկոսով, լոլիկը` 38,9 տոկոսով, սխտորը` 41 տոկոսով»,- ասաց Գուրգեն Մարտիրոսյանը՝ նշելով, որ էժանացել է վարունգը, գլուխ սոխը: