Վերակառուցման եւ զարգացման եվրոպական բանկի ծրագրերի մեծ մասը Հայաստանում գործելու է «ԵՄ-ն հանուն բիզնեսի» բրենդի տակ: Այս մասին, այսօր՝ հոկտեմբերի 14-ին, ԵՄ-ի եւ ՎԶԵԲ-ի կողմից տեղական փոքր եւ միջին ձեռնարկությունների աջակցությանն ուղղված ծրագրերին նվիրված քննարկման ժամանակ նշեց Հայաստանում ԵՄ պատվիրակության միջազգային օգնության եւ համագործակցության գրասենյակի ղեկավար Լուդովիկ Չեխանովսկին՝ հավելելով, որ ԵՄ-ն սովորաբար աշխատում է իրականացնող գործընկերների հետ միասին, ուղղակի օժանդակություն չի տրամադրում:
«Հաջորդ տաարի մեկնարկելու ենք մի շարք նախագծեր, որից մեկը ՎԶԵԲ-ի հետ։ Ծրագրերից մեկով կաշխատենք իշխանությունների հետ, որն ուղղված կլինի ՓՄՁ-ների զարգացմանը: Կարեւոր է, որ ՀՀ իշխանությունը բարելավի բիզնես կլիման եւ եվրոպական ընկերությունները ներդրումներ անեն այստեղ»,-ասաց Չեխանովսկին:
Նա նկատեց, որ իրենք շատ մտահոգություններ են ստանում տարբեր հայկական ընկերություններից, որոնք բողոքում են իշխանությունների կողմից ոչ բարյացկամ վերաբերմունքից: «Մենք այդ ուղղությամբ եւս պիտի աշխատենք»,-ընդգծեց նա:
Անդրադառնալով ՓՄՁ-ների խնդրին, Չեխանովսկին նշեց, որ նրանց համար բավական բարդ տարի է եղել։ «Խոսակցություններից շատերի հիմքում, որ ես ունեցել եմ ընկերությունների հետ, այն է, որ ՓՄՁ-ները ավելի մեծ ճնշումների տակ են, քան 4 տոկոս տնտեսական աճի դեպքում կարող էր լինել։ Թերահավատություն կա վիճակագրական թվերի հետ կապված, թեեւ չպիտի կասկածի տակ դնենք դրանք: Ուղղակի տարին է վատը»,իր խոսքն ամփոփեց նա:
