ԵԱՀԿ Մինսկի խմբի համանախագահներ Ջեյմս Ուորլիքը (ԱՄՆ), Պիեռ Անդրիեն (Ֆրանսիա) եւ Իգոր Պոպովը (Ռուսաստան) հոկտեմբերի 26-27-ին այցելելու են Լեռնային Ղարաբաղի Հանրապետություն:
NEWS.am-ի թղթակցի հետ զրույցում ԼՂՀ նախագահի մամուլի խոսնակ Դավիթ Բաբայանը նշեց, որ այդ օրերին տեղի է ունենալու նաեւ մշտադիտարկում:
«Ցանկացած այսպիսի հանդիպում մենք կարեւորում ենք, քանի որ նման հանդիպումների ժամանակ քննարկում ենք տարածաշրջանում տիրող իրավիճակը, ինչպես նաեւ հակամարտությանը վերաբերող հարցեր: Նախատեսվում է, որ համանախագահները պաշտոնական հանդիպումներ կունենան ԼՂՀ նախագահի, արտաքին գործերի նախարարի, պաշտպանության բանակ հրամանատարի հետ»,- ասաց Դավիթ Բաբայանը:
Հիշեցնենք, որ մինչեւ Արցախ մեկնելը՝ համանախագահներն այցելելու են Երեւան, իսկ արդեն հոկտեմբերի 28-ին կլինեն Բաքվում:
Ավելի վաղ ամերիկացի համանախագահ Ջեյմս Ուորլիքը հայտարարել էր, որ միջնորդները կայցելեն տարածաշրջան, որպեսզի հանդիպեն Հայաստանի եւ Ադրբեջանի նախագահներին եւ նախապատրաստեն նրանց հաջորդ հանդիպումը:
Հիշեցնենք, որ նախորդ ամիս Նյու Յորքում ՄԱԿ-ի գլխավոր ասամբլեայի նստաշրջանի շրջանակներում համանախագահները համատեղ հանդիպում էին ունեցել Հայաստանի եւ Ադրբեջանի ԱԳ նախարարների հետ:
