Հայաստանի Կոմունիստական կուսակցությունը հակված է սահմանադրական փոփոխությունների օգտին, սակայն վերջնական դիրքորոշումը կներկայացնի Կենտրոնական Կոմիտեի պլենումից հետո: Այդ մասին նոյեմբերի 16-ին հայտնել է ՀԿԿ ԿԿ-ի առաջին քարտուղար Տաճատ Սարգսյանը: Նրա խոսքով, այսօր հանրապետության 22 հազար կոմունիստներին անհանգստացնում են ոչ այնքան սահմանադրական փոփոխությունները, որքան հայ-ռուսական հարաբերությունները:
«Մենք կլինենք այն իշխանության կողքին, որը պահպանում է Երեւանի եւ Մոսկվայի միջեւ բարեկամությունը», - ընդգծել է Սարգսյանը: Վերջերս, հավելել է նա, Հայաստանի նախագահ Սերժ Սարգսյանը ընդունել է կուսակցության պատվիրակությանը: «Հանդիպման ընթացքում մենք երկրի ղեկավարին մի շարք առաջարկներ ներկայացրեցինք եւ քննարկեցինք մեզ անհանգստացնող հարցերը», - ասել է նա:
Հիշեցնենք, որ դեկտեմբերի 6-ին Հայաստանում հանրաքվե տեղի կունենա սահմանադրական փոփոխությունների նախագծի վերաբերյալ, որոնցով նախատեսվում է անցում կառավարման խորհրդարանական ձեւի: