Վրաստանի պետական անվտանգության ծառայությունը դիմել է լրատվամիջոցներին՝ կոչ անելով չտարածել Վրաստանի հասցեին իսլամիստ զինյալների տարածած տեսաուղերձը։ Այս մասին Facebook-ի իր էջում գրել է Պետական անվտանգության ծառայության մամուլի խոսնակ Նինո Գիորգոբիանին։
«Կոչ եմ անում եւ խնդրանքով դիմում եմ լրատվամիջոցներին։ Պետական անվտանգության նկատառումներից ելնելով՝ մի՛ նպաստեք սպառնալիքներ պարունակող այդ ուղերձի տարածմանը։ Անվտանգության ծառայությունը զբաղվում է այդ հարցով։ Արդեն հետաքննություն է ընթանում»,- ասված է հաղորդագրության մեջ, փոխանցում է «Գրուզիա Օնլայն»-ը։
Ինչպես ավելի վաղ հայտնել էին վրացական լրատվամիջոցները, նոյեմբերի 23-ին համացանցում տեսաուղերձ էր հրապարակվել, որը իբր պատրաստել էին ԻՊ զինյալները։ Տեսանյութում վրացերեն խոսող մի քանի զինված անձ Վրաստանում ապրող մուսուլմաններին կոչ են անում աջակցել ԻՊ-ին։ Տեսանյութում նաեւ Վրաստանի հասցեին սպառնալիքներ են հնչում։
