![](img/news/29/80/55/default.jpg)
Հայաստանի կողմից արված առաջարկություններն արտացոլվել են Եվրոպայի Հարեւանության քաղաքականության վերանայման փաստաթղթում, մասնավորապես, ԵՄ կողմից գործընկեր պետությունների նկատմամբ տարբերակված մոտեցման որդեգրումը: Այս մասին, նոյեմբերի 23-ին Բրյուսելում ԵՄ Արեւելյան գործընկերության (ԱլԳ) ավագ պաշտոնյաների հերթական հանդիպման ժամանակ նշել է Հայաստանի ԱԳ նախարարի տեղակալ Կարեն Նազարյանը։
Նշենք, որ հանդիպմանը մասնակցել են ԱլԳ 6 գործընկեր երկրների եւ ԵՄ անդամ պետությունների ներկայացուցիչներ։
Եվրոպական Արտաքին հարաբերությունների ծառայության նորանշանակ տնօրեն Թոմաս Մեյր Հարթինգի նախագահությամբ անցած հանդիպման նպատակն էր քննարկել Արեւելյան գործընկերության Ռիգայի գագաթաժողովի արդյունքներից բխող քայլերը եւ Եվրոպական հարեւանության քաղաքականության (ԵՀՔ) վերանայման գործընթացը։
ԱԳ նախարարի տեղակալ Կարեն Նազարյանն իր ելույթում գոհունակությամբ նշեց, որ Հայաստանի կողմից արված առաջարկություններն արտացոլվել են ԵՀՔ վերանայման փաստաթղթում, մասնավորապես, ԵՄ կողմից գործընկեր պետությունների նկատմամբ տարբերակված մոտեցման որդեգրումը, ինչը հնարավորություն կտա լիովին օգտագործել կողմերի ներուժն ու կարողությունները՝ փոխադարձ հետաքրքրություն ներկայացնող բոլոր ոլորտներում ԵՄ-ի հետ համագործակցությունը առաջ մղելու համար։
Հայաստանի արտգործնախարարի տեղակալը կարեւորեց տարբեր ինտեգրացիոն գործընթացների միջեւ համագործակցության խթանումը։
Հանդիպմանն անդրադարձ կատարվեց նաեւ Հայաստան-ԵՄ հարաբերություններում վերջին զարգացումներին, այդ թվում՝ նոր իրավական փաստաթղթի շուրջ Երեւանի եւ Բրյուսելի միջեւ մեկնարկելիք բանակցություններին ու ԵՄ մի շարք ծրագրերին Հայաստանի մասնակցության հետ կապված հարցեր։
Հանդիպման մասնակիցները նաեւ մտքեր փոխանակեցին Թբիլիսիում նոյեմբերի 26-ին կայանալիք ԱլԳ անդամ երկրների արտգործնախարարների ոչ-պաշտոնական երկխոսության օրակարգին։