ԱՄՆ Բալթիմոր քաղաքի օդանավակայանում ոստիկանությունը չվերթից իջեցրել է 4 ուղեւորների այն բանից հետո, երբ օդանավում նրանց կողքը նստած ուղեւորուհին հայտարարել է, որ նրանցից մեկին հաղորդագրություն է եկել «դինամիտ» բառով, գրում է Gazeta-ն՝ վկայակոչելով The Mail-ը:
Միջադեպը տեղի է ունեցել նոյեմբերի 17-ին, Փարիզի ահաբեկչություններից մի քանի օր անց, Spirit Airlines ավիաընկերության օդանավում, որն ուղեւորվում էր Չիկագո եւ արդեն թռիչքուղու վրա էր:
Ուղեւորներից մեկը դիմել է օդանավի անձնակազմին եւ հայտնել, որ իր հարեւանությամբ նստած մարդը մի քանի հեռախոսազանգ է կատարել եւ խոսել է «ոչ անգլերեն»: Զգոն կինը պնդել է, որ ինքը աչքը գցել է հարեւանի հեռախոսին եւ տեսել այնտեղ երկու բառ՝ BLR եւ Dynamite (BLR-ն Հնդկաստանի Բանգալոր քաղաքի օդանավակայանի կոդային անվանումն է):
Օդանավի հրամանատարը որոշել է վերադառնալ տերմինալ, իսկ կասկածելի ուղեւորին եւ նրա երեք ընկերներին հարցաքննել են, սակայն ազատ են արձակել առանց որեւէ մեղադրանք առաջադրելու: «Նրա բջջային հեռախոսում նման հաղորդագրություն չի հայտնաբերվել»,-ասել է ոստիկանության տրանսպորտային վարչության ներկայացուցիչ Ջոնաթան Գրինը:
