Ավստրալական Red Automotive Technologies նորելուկ ընկերությունը մտադիր է էլեկտրական ամենագնաց ստեղծել, որը կկարողանա մինչեւ 1200 կիլոմետր անցնել եւ զարգացնել 250 կմ/ժ արագություն: Եթե նախագծի համար անհրաժեշտ ֆինանսավորումը գտնվի, ընկերությունը հույս ունի միանգամից մի քանի նմուշի սերիական թողարկում իրականացնել եւ տասը տարի անց տարեկան մինչեւ 75 հազար ավտոմեքենա թողարկել: Այդ մասին գրում է Motoring պարբերականը:
Էլեկտրական ամենագնացի նախագիծը պատկանում է ավստրալացի ինժեներ Պոլ վան Լուին: Նա Ադելաիդայում սեփական ինժեներային ընկերություն ունի, որը վերջին 22 տարվա ընթացքում սպառողական ապրանքների նախագծեր է մշակում, ինչպես նաեւ տարբեր համակարգեր եւ սարքավորումներ պաշտպանության, ավտոմոբիլային արդյունաբերության եւ լեռնահանքարդյունաբերության համար: Այս պահին գործարարը նախագծի զարգացման համար արդեն աշխատանքի է ընդունել GM Holden ընկերության նոր արտադրանքի նախագծման բաժնի նախկին ղեկավար եւ էլեկտրամեքենաների ոլորտի մասնագետ Յեն Մաքլիվին, գրում է Motor-ը:
Red Automotive Technologies-ը նախատեսում է իր նմուշների համար մոդուլային կառուցվածք օգտագործել: Ընկերության առաջին ամենագնացը չորս էլեկտրաշարժիչ կունենա (ամեն անիվի համար` մեկը), երկուաստիճանանի փոխանցում եւ «նորարարական» կախոց` կարգավորվող ճանապարհային լուսաշերտով: Բացակը կհասնի 375 մմ-ի, անիվների հոդակապերը` 450 մմ-ի, իսկ քարշակի զանգվածը 3,5 տոննայի:
Բացառապես էլեկտրականության քարշուժով ամենագնացը մոտ 200 կմ կանցնի: Նմուշը նաեւ ներքին այրման շարժիչ կստանա (բենզինային կամ դիզելային), որը կօգտագործվի բացառապես շարժման ընթացքում մարտկոցների ենթալիցքավորման համար: Այդ ագրեգատի շնորհիվ ընթացքի հնարավորությունը կմեծանա մինչեւ 1200 կմ: Նորույթը կկարողանա իր արագությունը զրոյից «հարյուրի» հասցնել չորս վայրկյանից էլ պակաս ժամանակում: Ամենագնացային հզորությունների առումով, ինչպես ասում են ընկերությունում, այս նմուշը կկարողանա գերազանցել Jeep-ին եւ Toyota Land Cruiser-ին:
Մոտ ժամանակներս Red Automotive Technologies-ը կսկսի ֆինանսական միջոցների փնտրտուքը: Ընկերությունը մտադիր է հետագայում դուրս գալ բորսա եւ IPO անցկացնել: Առաջին նմուշի սկզբնական գինը մոտ 85 հազար դոլար կկազմի: