1952թ. Թուրքիային ՆԱՏՕ-ի կազմում ընդգրկելը անհեռանկարային քայլ էր, եւ հիմա այդ միությունը ավելի ու ավելի շատ է «սատանայի հետ դաշինք» հիշեցնում, գրում է American Thinker ամերիկյան պահպանողական ամսագիրը:
Հնարավոր է, որ ավելի քան 6 տասնամյակ առաջ Թուրքիայի անդամակցությունը ՆԱՏՕ-ին իմաստ ուներ, եւ թուրքերը կարող էին օգնել խորհրդային առաջխաղացման դեմ պայքարում, սակայն ժամանակի հետ Թուրքիան վերածվել է «բարդ երեխայի», կարծում է հոդվածագիրը: 1974թ. ներխուժելով Կիպրոս՝ Թուրքիան դաշինքի ներսում պառակտում սադրեց, իսկ 2012թ. սկսեց կրակել Սիրիայի օբյեկտներին՝ իր արարքը բացատրելով այն հանգամանքով, որ Սիրիան ավելի վաղ կրակ է արձակել Թուրքիայի ուղղությամբ: 2000-ական թթ. այդ երկիրը սկսեց իսլամիզմի նկատմամբ վտանգավոր հակում դրսեւորել, ինչը պետք է ազդանշան լիներ ՆԱՏՕ-ի համար:
Վերջերս Ֆրանսիայի նախագահ Ֆրանսուա Օլանդը կոչ էր արել պետություններին միավորվել ԻՊ-ի դեմ պայքարելու համար: ՌԴ նախագահ Վլադիմիր Պուտինը նշում է, որ Թուրքիան արդեն վաղուց ԻՊ-ի դաշնակիցն է, քանի որ աջակցում է նավթի վաճառքի նրա գործողություններին:
Նշվում է, որ Արեւմուտքը Ռուսաստանի հետ ավելի շատ շփման եզրեր ունի, քան իսլամական աշխարհի: Այդ պատճառով ՆԱՏՕ-ն պետք է վերագնահատի իր դաշնակիցներին եւ Ռուսաստանին հրավիրի միանալ դաշինքին, փոխանցում է Gazeta-ն:
