Ադրբեջանի Նարդարան բնակավայրում արտակարգ դրության ռեժիմ է սահմանվել: Մթնշաղից հետո ավանում ոստիկանության եւ ներքին զորքերի ուժերը մնում են, որոնք զբաղեցրել են առանցքային դիրքերը: Տեղի բնակիչներին թույլ չեն տալիս հավաքվել: Ավանի կենտրոնական հատվածներում տրանսպորտային երթեւեկությունն արգելված է:
Այսօրվա գործողության ընթացքում մի քանի մարդ է ձերբակալվել: Տներում անցկացված խուզարկությունների ժամանակ բռնագրավել են նույնիսկ կենցաղային կացինները: Ավանում նախկինի պես էլեկտրականություն չկա: Միայն երեկոյան կողմ սկսել է գործել բջջային ինտերնետը:
Դեռեւս հստակ չէ նաեւ նոյեմբերի 26-ի գործողության ժամանակ զոհվածների հուղարկավորության հարցը: Որոշ տեղեկությունների համաձայն, նրանց գաղտնի հողին են հանձնել:
Իշխանամետ լրատվամիջոցները հաղորդում են Նարդարանում կարգուկանոն հաստատելու եւ բարիկադները քանդելու մասին: Սակայն տեղական ավագանին հիշեցնում է, որ բողոքի ակցիան ավարտվել է, իսկ բարիկադները հավաքվել են դեռեւս նոյեմբերի 29-ին:
Վաղը նույնպես ծանր օր է սպասվում. դեկտեմբերի 2-ն Իմամ Հուսեյնի սգո 40-րդ օրն է, որը շիաները նշում են Մուհարամ ամսին: Ըստ Contact.az-ի, սովորաբար այդ օրը հազարավոր հավատացյալներ Նարդարանում հավաքվում են սգո արարողությունների:
