Թուրք-սիրիական սահմանը հատելուց հետո «Իսլամական պետության» նավթատարները տեղափոխվում են նավահանգիստներ եւ նավերով ուղարկվում երրորդ երկրներ։ Այս մասին չորեքշաբթի հայտարարել է ՌԴ ԶՈւ Գլխավոր շտաբի պետ Սերգեյ Ռուդսկոյը, փոխանցում է «ՌԻԱ Նովոստի»-ն։
ՌԴ ՊՆ-ն որպես ապացույց ներկայացրել է արբանյակային լուսանկարները, որոնցում, ըստ ռուս զինվորականների, պատկերված են ԻՊ հսկողության տակ գտնվող տարածքներից Թուրքիա ուղեւորվող բենզատարների շարասյուները։
«Նոյեմբերի 16-ին Ռեյհանլիում արված լուսանկարում դուք տեսնում եք Սիրիայի սահմանի մոտակայքում մինչեւ 360 բենզատար եւ մեծ բեռնատար ավտոմեքենաներ։ «Բ» քառակուսիում կա 160 բենզատար, որոնք հատել են սահմանը։ «Ա» քառակուսիում երեւում է 100 մեքենա, որոնք շարժվում են դեպի Սիրիայի սահման»,- ասել է Ռուդսկոյը ճեպազրույցի ժամանակ։
Նա նշել է, որ տիեզերական հետախուզության միջոցներով հստակ երեւում է, որ սահմանը հատելուց հետո ավտոցիստեռնները եւ բեռնատար մեքենաները ուղեւորվում են Դերթյոլ եւ Իսքանդերուն նավահանգիստներ, որտեղ տանկերների համար կան հատուկ նավամատույցներ։ «Նավթի մի մասը վերաբեռնում են եւ ուղարկում Թուրքիայի սահմաններից դուրս»,- նշել է նա։
