Երեւանի առեւտրա-արդյունաբերական պալատը չի մասնակցի սեպտեմբերին 19-ին Վանի Աղթամարի Սուրբ Խաչ եկեղեցում մատուցվելիք պատարագի արարողությանը: Այս մասին NEWS.am-ի թղթակցին հայտնեց պալատի տնօրեն Կարեն Մարտիրոսյանը: Նա նշեց, որ պալատն իր անդամներին տեղեկացրել է Թուրքիայի առեւտրա-արդյունաբերական պալատի կողմից ստացված հրավերի մասին, սակայն պալատի անդամներից ոչ մեկը պատարագին մասնակցելու ցանկություն չի հայտնել: Մարտիրոսյանն ասաց նաեւ, որ իրենք ֆաքսով տեղեկացրել են Թուրքիայի առեւտրա-արդյունաբերական պալատի նախագահին, որ հայկական կողմը չի մասնակցելու միջոցառմանը: «Մենք ուզում էինք գնալ, քանի որ Երեւանում այդ մասին համապատասխան հուշագիր էինք ստորագրել: Սակայն ստացվեց այնպես, որ չենք մասնակցելու»,-ասաց Մարտիրոսյանը:
Նա նաեւ հավելեց, որ այդ որոշումը կայացրել են ավելի վաղ՝ մինչեւ վերջին զարգացումները, երբ հայտնի դարձավ, որ պատարագը մատուցվելու է առանց եկեղեցու գմբեթին խաչ տեղադրելու: «Մենք օգոստոսի 26-ին ֆաքսով հայտնել ենք, որ չենք մասնակցելու»,-ասաց Երեւանի առեւտրա-արդյունաբերական պալատի նախագահը:
Նշենք, որ այս տարվա մայիսին Երեւան էր ժամանել Վանի առեւտրա-արդյունաբերական պալատի նախագահ Զահիր Քանդաշօղլուն: Երբ հայտնի դարձավ, որ պատարագը մատուցվելու է առանց խաչ տեղադրելու, Քանդաշօղլուն Պոլսո հայոց պատրիարքի փոխանորդ արքեպիսկոպոս Արամ Աթեշյանին հայտնել էր, որ սեպտեմբերին 19-ին հատկապես հայաստանցի հյուրերին ամենալավ ձեւով են դիմավորելու եւ պատվելու: «Մենք ձեռներեցներ ենք եւ հավատում ենք, որ առեւտրա-տնտեսական կապերի բարելավման դեպքում շատ հարցեր կլուծվեն»-ասել է Քանդաշօղլուն՝ նշելով, որ իրենք ցանկանում են նաեւ Երեւանի առեւտրա-արդյունաբերական պալատից եկողների համար մի լավ հյուրասիրություն կազմակերպել: Թուրք արդյունաբերողները, փաստորեն, ստիպված են լինելու պատարագի օրը պատվել եւ հյուրասիրել իրենք իրենց, քանի որ հայկական կողմը հրաժարվել է մասնակցել այդ արարողությանը:
Հիշեցնենք, որ թուրքական իշխանությունները հայտարարել են, թե մինչեւ սեպտեմբերի 19-ը տեխնիկական պատճառներով չեն հասցնի Աղթամարի Ս. Խաչի գմբեթին Խաչը տեղադրել եւ այն կմնա պատարագից հետո:
