Ռուսաստանի ԱԳՆ-ն դրական է գնահատել Սիրիայի Հոմս քաղաքի Վաեր շրջանում հրադադարի համաձայնագրի ձեռքբերման մասին համաձայնագիրը: Այս մասին տեղեկացնում է ՌԴ ԱԳՆ կայքը:
«Ստացված տեղեկատվության համաձայն, դեկտեմբերի 1-ին ՄԱԿ-ի միջնորդությամբ համաձայնություն է ձեռք բերվել սիրիական բանակի եւ հակակառավարաման զինված խմբավորումների միջեւ՝ սիրիական Հոմս քաղաքի Վաեր շրջանից նրանց զինյալների հեռանալու մասին»,- ասված է հաղորդագրությունում:
Ըստ Gazeta-ի, շաբաթ՝ դեկտեմբերի 5-ին, 200-300 հոգուց բաղկացած առաջին խումբը, կյանքը եւ անձնական զենքը պահպանելու պայմանով, կսկսի լքել տեղանքը, ինչից հետո այնտեղ կարող են վերադառնալ խաղաղ բնակիչները:
Ռուսական ԱԳՆ-ում կարծում են, որ այդպիսի քայլերը կարող են Սիրիայում համընդհանուր զինադադարի առիթ դառնալ՝ ՄԱԿ-ի արդյունավետ դերակատարմամբ, ինչպես նաեւ բարենպաստ պայմաններ ստեղծել երկրի կառավարության եւ ընդդիմության միջեւ կայուն բանակցային գործընթացի համար:
