Վանի առեւտրա-արդյունաբերական պալատի նախագահ Զահիր Քանդաշօղլուն մեկնաբանելով Աղթամարի Ս. Խաչ եկեղեցու վրա մինչեւ պատարագը խաչ չտեղադրելու համար իրենց մասնակցությունը չեղյալ հայտարարած Մայր Աթոռ Ս. Էջմիածնի որոշումը` նշել է. «Ճիշտ որոշում են կայացրել: Մենք խոսք են տալիս, որ կտեղադրենք ու չենք կարողանում»:
Թուրքական IHA գործակալության փոխանցմամբ` մինչ սեպտեմբերի 19-ի Ս. Խաչի վերաբացումը խաչի չտեղադրման պատճառով հայաստանցի հոգեւորականների այցի չեղյալ հայտարարելը, Վանում խիստ արձագանք է գտել:
Վանի առեւտրա-արդյունաբերական պալատի նախագահ Զահիր Քանդաշօղլուն, ով այս տարվա մայիսին Երեւանում մասնակցել է միջազգային տուրիզմի ցուցահանդեսին, նշել է, թե հայաստանցի հոգեւորականները ճիշտ են արել, որ չեղյալ են հայտարարել իրենց այցը եւ հավելել. «Խոսք ենք տալիս, որ կտեղադրենք ու հետո չենք կարողանում տեղադրել: Դա անելու բան չէ ու սխալ է: Ափսոս է մեր այսքան աշխատանքը: Պետք է անպայման խաչը տեղադրել: Չպետք է նման մանր բանի համար այս խնդիրը փակուղի մտցնել: Տուրիզմի եւ մշակույթի նախարարը պետք է այս խնդիրը լուծի: Նախարարին նամակ եմ գրելու եւ հասարակական կազմակերպությունների ու Վանի պատգամավորների հետ կազմակերպվելիք ժողովին քննարկելու եմ այս հարցը»-նշել է Զահիր Քանդաշօղլուն:
Նշենք, որ օրեր առաջ Վան ժամանած Պոլսո Հայոց պատրիարքական ընդհանուր փոխանորդ, արք. Արամ Աթեշյանը նշել էր, թե Վանի նահանգապետն իրեն հայտնել է, որ տեխնիկական խնդիրների պատճառով չեն հասցնի մինչեւ պատարագ տեղադրել 200 կիլոգրամանոց խաչը, որի տեղադրումը կիրականացվի պատարագից հետո:
