Երեւանում բացվել է գեղասահքի եւ տափօղակով հոկեյի մանկապատանեկան մարզադպրոց։ Անվանի գեղասահորդ, ՌԴ հասարակական գործիչ, Պետդումայի պատգամավոր Իրինա Ռոդնինայի գեղասահքի դպրոցը գործելու է Ծովակալ Իսակովի պողոտայում գտնվող նորակառույց շենքում՝ Իրինա Ռոդնինայի ղեկավարությամբ:
«Սա այն դեպքն է, երբ դժվար է էմոցիաները բառերով փոխանցել: Այն, որ մարզադպրոցը իմ անունով է անվանվել, կարծում եմ՝ դա առաջին հերթին արդյունք է մեր երկրների բարեկամության և գեղասահքի այն ժառանգության, որը կա մեր երկրում: Ես շատ շնորհակալ եմ, որ իմ անունով առաջին մարզադպրոցը բացվել է ոչ թե Ռուսաստանում, այլ Հայաստանում»,- լրագրողների հետ զրույցում ասաց Իրինա Ռոդնինան:
Երկհարկանի մարզադպրոցի հողատարածքի մակերեսը 1 հա է, կառուցապատված հողատարածքը 4.360 քմ է, որից 1800 քմ զբաղեցնում է 538 նստատեղով սահադաշտը:
Մարզադպորցի 180 սաները նախքան այս սահադաշտի բացակայության պատճառով ձմռանը պարապում էին Կարապի լճում կառուցված սահադաշտում, ամռանը գեղասահորդները՝ պարուսուցման դահլիճում, հոկեյիստները` բակում:
«Եթե այն ժամանակ մենք մարզադպրոցը պահպանելու խնդիր ունեինք, ապա հիմա մեր խնդիրն այն զարգացնելն է, որովհետև արդեն մենք ունենք միջազգային չափանիշներին համապատասխան բարձրակարգ մարզադպրոց»,- լրագրողների հետ զրույցում նշեց մարզադպրոցի տնօրեն Մելինե Ավագյանը:
Մարզադպրոցի բացմանն այսօր՝ դեկտեմբերի 5-ին,ներկա էր նաեւ ՀՀ նախագահը: