Ազատության հրապարակում մեկնարկել է սահմանադրական փոփոխությունների դեմ պայքարող «Նոր Հայաստան» հանրային փրկության ճակատի հանրահավաքը:
NEWS.am-ի թղթակիցը հաղորդում է, որ Ազատության հրապարակում են «Ժառանգության» առաջնորդ Րաֆֆի Հովհաննիսյանը, Հիմնադիր խորհրդարանի անդամ, ազատամարտիկ Ժիրայր Սեֆիլյանը: Հավաքի մասնակիցները դեռ չեն հայտարարել՝ ինչ են պատրաստվում անել այսօր:
Հանրահավաքից առաջ մասնակիցները մեկ րոպե լռությամբ հարգեցին Սպիտակի երկրաշարժի զոհերի հիշատակը:
Նշենք, որ Հայաստանում դեկտեմբերի 6-ին սահմանադրական փոփոխությունների հանրաքվե անցկացվեց, որի արդյունքում ընտրողների 63,35 տոկոսը
(825 851 ընտրող) «Այո» քվեարկեց սահմանադրական փոփոխություններին, 32,35 տոկոսը՝ «Ոչ» (421 600 ընտրող):
«Նոր Հայաստան» հանրային փրկության ճակատը հանրաքվեից անմիջապես հետո հանրահավք ու երթ էր սկսել Երեւանի կենտրոնում՝ պահանջելով չեղյալ հայտարրել քվեարկությունը, որը նրանք համարում են կեղծված: Մինչեւ առավոտյան ժամը 3-ը շարժման մասնակիցները երթ էին անում Երեւանի կենտրոնում մի քանի անգամ ապարդյուն փորձելով մոտենալ ԿԸՀ շենքին, որը բոլոր կողմերից շրջափակված էր ոստիկաններով:
Նշենք, որ այսօր ժամը 18:00-ին Ազատության հրապարակում հանրահավաք է հրավիրել նաեւ «Ոչ»-ի ճակատը, որի կազմում են ՀԱԿ-ը եւ «Չեք անցկացնի» նախաձեռնությունը: