Երեւանի Ազատության հրապարակում արդեն 9-րդ օրը նստացույց անող «Նոր Հայաստան» հանրային փրկության ճակատի անդամների կողմից տեղադրված հովանոցի վրայի ծածկոցը ոստիկանությունը գիշերն առգրավել է: Այս մասին NEWS.am-ի հետ զրույցում ասաց «Նոր Հայաստանի» անդամ Գեւորգ Սաֆարյանը:
«Գիշերը նորմալ է անցել, ուղղակի հովանոցներից մեկի վրա տոպրակ էինք գցել, որ տաք լինի, ոստիկանությունը հավաքեց տարավ: Բայց մենք ոչ մի բան չարեցինք, թողեցինք, որ տանեն: Իհարկե, ասացինք, որ ապօրինի է, բայց դե օգուտ չտվեց: Գիշերն այդտեղ եղել ենք երկու տասնյակ անդամներով»,-ասաց Գեւորգ Սաֆարյանը:
Հիշեցնենք, որ Երեւանի Ազատության հրապարակում «Նոր Հայաստան» հանրային փրկության ճակատը 2015թ. դեկտեմբերի 1-ից նստացույց է անում՝ պահանջելով սահմանադրական հանրաքվեի չեղարկում եւ Սերժ Սարգսյանի հրաժարականը:
