Պոլսո Հայոց պատրիարքական ընդհանուր փոխանորդ արքեպիսկոպոս Արամ Աթեշյանը պատասխանել է գերմանական Deutsche Welle-ի հարցերին` կապված Վանի Աղթամար կղզու Ս. Խաչ եկեղեցու պատարագի հետ:
Արք. Աթեշյանը, ով առաջիկա սեպտեմբերի 19-ին պետք է գլխավորի 100 տարի անց Սուրբ Խաչում իրականացվելիք առաջին պատարագը, նշել է, թե Թուրքիայի հայերը այդ պատարագին ոգեւորությամբ են սպասել, սակայն խաչի չտեղադրման լուրը, հայերի այդ ոգեւորությունը կոտրեց:
Սրբազանը հիշեցրել է, որ նախատեսված է եղել պատարագից մեկ շաբաթ առաջ խաչը տեղադրել եկեղեցու գմբեթին եւ հավելել, որ Թուրքիայում սեպտեմբերի 12-ի հանրաքվեն մեջտեղ եկավ եւ խաչի տեղադրումը անհնարին դարձավ, սակայն պատարագի օրը մասնակիցները կարող են տեսնել այն խաչը, որը պետք է տեղադրվի պատարագից հետո:
«Վանի նահանգապետը հայ համայնքին խոսք է տվել, որ պատարագից հետո խաչը անպայման դրվելու է: Մինչեւ հիմա մտածում էինք, որ 5 հազար հոգի կմասնակցի պատարագին, սակայն ներկա իրավիճակը սահմանափակում է այցելուների քանակը, քանի որ պատարագին մասնակցել ցանկացողների մի մասը հրաժարվեց գալ: Հրաժարվեց պատարագին մասնակցել նաեւ Սուրբ Էջմիածինը, ավելի վաղ հրաժարվել էր Անթիլիասը»-նշել է Պոլսո հայոց պատրիարքական ընդհանուր փոխանորդ, արք. Արամ Աթեշյանը` ամփոփելով, որ Երուսաղեմը մասնակցելու է:
