2015 թ. դեկտեմբերի 13-ին ՀՀ ԿԸՀ-ն, անտեսելով խախտումների մասին ոչ կուսակցական դիտորդների եւ քաղաքական կուսակցություների բազմաթիվ արժանահավատ հաղորդումները, հաստատեց սահմանադրական հանրաքվեի կեղծված արդյունքները:
Այդ մասին ասվում է «Նոր Հայաստան» հանրային փրկության ճակատի Քաղաքական խորհուրդի հայտարարության մեջ։
«Հանրության տեսադաշտում հայտնված ընտրակեղծարարության փաստերը վկայում են, որ հանրաքվեի անաչառ անցկացմանը միջամտած անձինք, այդ թվում՝ հանձնաժողովների անդամները, ընտրախախտումները կատարել են ՀՀԿ-ի ընտրական շտաբների հովանու ներքո, բացահայտ կերպով՝ համոզված լինելով, որ անպատիժ են մնալու:
Հրապարակված փաստերը վկայում են նաեւ, որ իրավապահ մարմինները ընտրողների ազատ կամաարտահայտման խախտումների ժամանակ եղել են պասիվ դիտորդի դերում, իրենց նախաձեռնությամբ չեն կանխել ընտրախախտման գոնե մեկ դեպք եւ որեւէ քայլ չեն կատարել նման խախտումներ կատարած անձանց պատասխանատվության ենթարկելու ուղղությամբ:
Ավելին՝ հանրաքվեի օրը ոստիկանությունը շրջափակել է ԿԸՀ-ի շենքը եւ ուժ գործադրելու սպառնալիքով թույլ չի տվել, որ «Նոր Հայաստան» ճակատի լիազոր ներկայացուցիչները մուտք գործեն այնտեղ եւ հենց այդ պահին տեղի ունեցող արդյունքների ամփոփման ընթացքում զանգվածային ընտրախախտումների վերաբերյալ իրենց ունեցած տեղեկություները եւ բողոքը ներկայացնեն ԿԸՀ-ին:
Հաշվի առնելով այս ամենը, «Նոր Հայաստան» ճակատի քաղաքական խորհուրդը հայտարարում է, որ հանրաքվեն կեղծվել է ՀՀԿ-ի կենտրոնական շտաբի համակարգմամբ եւ ուղղորդմամբ, իսկ դրա արդյունքները հաստատվել են նույն ՀՀԿ-ին ծառայող ԿԸՀ-ի ապօրինի որոշմամբ, ասվում է «Նոր Հայաստան» հանրային փրկության ճակատի Քաղաքական խորհուրդի հայտարարության մեջ։