ՀՀԿ ԳՄ նիստում քննարկվել է սահմանադրական փոփոխություններից հետո սպասվող օրենսդրական փոփոխությունները։ Այս մասին այսօր՝ դեկտեմբերի 16-ին, նիստից հետո լրագրողների հետ զրույցում հայտարարել է կուսակցության խոսնակ Էդուարդ Շարմազանովը։
Հանրաքվեի արդյունքները Սահմանադրական դատարանում վիճարկելու ՀԱԿ-ի նախաձեռնության վերաբերյալ ասել է՝ հանրաքվեի արդյունքները վիճարկման առարկա չեն։
Լրագրողների հարցին, թե կհաջողվի՞ ՀԱԿ-ին հավաքել ՍԴ դիմելու համար անհրաժեշտ 27 ստորագրությունը, Շարմազանովը պատասխանել է. «Սահմանադրական դատարան դիմելը իրենց սահմանադրական իրավունքն է, մինչեւ որբաթ ժամը 18։00-ն ժամանակ ունեն։ Կապրենք՝ կտեսնենք։ Հիմա, որ ասեմ՝ չի հաջողվի իրեց դիմել Սահմանադրական դատարան, կասեն՝ Շարմազանովը չարախնդում է։ Ես չեմ ուզում կենտրոնանալ դրա վրա»։
ԱԺ փոխխոսնակն ասել է՝ հանրաքվեի արդյունքների վերաբերյալ անվստահության մթնոլորտ չկա հանրության շրջանում։
Ըստ Շարմազանովի՝ ՍԴ նախագահ Գագիկ Հարությունյանը, որը սահմանադրական փոփոխությունների մշտական հանձնաժողովի ղեկավարն էր, արդար որոշում կկայացնի, եթե ՀԱԿ-ին հաջողվի դիմել ՍԴ։
«Գագիկ Հարությունյանը ցանկացած որոշում կայացնելիս՝ առաջնորդվում է ոչ թե անձնական, այլ պետական շահի գերակայությամբ, պետք չի կասկածանքով նայել ու լսել այն հեքիաթները, որից նավթալինի հոտ է գալիս, որը պատմում են մարգինալացված, քաղաքական ազդեցություն չունեցող ընդդիմադիր ներկայացուցիչները»,-ասել է ՀՀԿ խոսնակը։
