![](img/news/03/03/37/default.jpg)
Վանի Աղթամար կղզում Սուրբ Խաչ եկեղեցու վրա խաչ չտեղադրելու թուրքական իշխանությունների որոշումը խուճապի է մատնել Վանի գործարարներին եւ բնակչությանը, քանի որ բազմաթիվ հայաստանցիներ հայտարարել են, թե չեղյալ են հայտարարել իրենց նախօրոք արած ամրագրումները։
Թուրքական Referans-ի փոխանցմամբ՝ այս տարվա մայիսին Հայաստան ժամանած եւ Երեւանի առեւտրա-արդյունաբերական պալատի հետ համագործակցության հուշագիր ստորագրած Վանի առեւտրա-արդյունաբերական պալատի նախագահ Զահիր Քանդաշօղլուն նշել է, թե իրենց խոսքը խոսք է եւ անպայման խաչը կտեղադրվի։ «Վանի նահանգապետը հայտարարել էր, թե տեխնիկական խնդիրների պատճառով խաչը հնարավոր չէ տեղադրել։ Այդ դեպքում, մենք մեր միջոցներով եւ հատուկ տեխնիկայով խաչը կտեղադրենք։ Մենք չենք ցանկանում, որ գեթ մեկ հայ չեղյալ հայտարարի իր այցը Վան՝ խաչը չտեղադրելու պատճառով»-նշել է Քանդաշօղլուն:
Նշելով, որ արդեն 3 հազար ամրագրումներից 250-ը չեղյալ է հայտարարվել՝ Վանի առեւտրի պալատի նախագահն ասել է. «Երկուշաբթի խաչը կտեղափոխենք կղզի եւ կսկսենք տեղադրման աշխատանքները։ Մենք դա խոստանում ենք մեր հայ հյուրերին։ Նման բացասական հայտարարությունից հետո թույլ չենք տա այս կարեւոր իրադարձությունը փակուղի մտցնել»-նշել է Քանդաշօղլուն՝ հավելելով, որ իրենց հաշվարկներով, Վան պետք է գար 5 հազար զբոսաշրջիկ, որոնք կծախսեին մոտ 1500-ական եվրո, ինչը մեծ աջակցություն կլիներ Վանի տնտեսությանը։
Իր հերթին հայ-թուրքական գործարար հանձնաժողովի թուրք համանախագահ Նոյան Սոյաքը նշել է, թե խաչի հետ կապված ճգնաժամը կապված է սեպտեմբերի 12-ի հանրաքվեի հետ։