Ոչ միայն ՀՀՇ-ն, այլ նաեւ Հայաստանի ողջ քաղաքական դաշտը նահանջել է ազատական արժեքներից: Այս մասին սեպտեմբերի 10-ին լրագրողների հետ հանդիպման ժամանակ հայտարարեց Հայոց համազգային շարժում կուսակցության նախկին անդամ, Հայաստանի նախկին ԱԳ նախարար Ալիկ Արզումանյանը:
Նա նաեւ անդրադարձավ ՀՀՇ վերջին համագումարին եւ դրան հաջորդած զարգացումներին՝ նշելով. «Հնչեցվել են մեր ընկերների կողմից կասկածներ համագումարի մասին, փաստը, որ նման ահազանգեր հնչել են, անընդունելի է, որովհետեւ, լինելով ՀՀՇ անդամ, մշտապես կարծել եմ, որ ՀՀՇ–ն այն լիբերալ ուժն է, որը պետք է իր ներքին հարցերում առաջնորդվի ժողովրդավարական սկզբունքներով։ Ցավում եմ, որ այսօր նահանջ է նկատվում։ Շատ մեծ ցավ կարող եմ հայտնել, որ լիբերալ դաշտն է այսօր ոչնչացվում Հայաստանում, չգիտես ինչու՝ այդ թեմաներով ոչ ոք չի խոսում»,– հայտարարեց Արզումանյանը: Նրա խոսքով՝ ՀԱԿ–ում ազատական հոսանքի լոկոմոտիվ պետք է լինի ՀՀՇ–ն: «Կկարողանա՞, ուրեմն ամեն ինչ նորմալ է, չի՞ կարողանա, ուրեմն լուրջ խնդիր ունենք, եւ Հայաստանում բացակայում է կարեւորագույն քաղաքական հոսանքը՝ ազատական ժողովրդավարական հոսանքը»,-նկատեց ՀԱԿ ներկայացուցիչը եւ հույս հայտնեց, որ ՀՀՇ–ն կվերականգնի այն արժեքները, որոնք որդեգրել է:
