«Ժառանգություն» կուսակցությունը վերակազմավորման կարիք չունի եւ «Նոր Հայաստան» ճակատի շրջանակում պայքարում է արտահերթ ընտրությունների հասնելու համար: Այս մասին NEWS.am-ի հետ զրույցում ասաց կուսակցության փոխնախագահ Արմեն Մարտիրոսյանն` անդրադառնալով կուսակցությանն ուղղված այն քննադատություններին, թե պառակտվել են ու կորցրել երբեմնի հեղինակությունը:
«Ժառանգությունն» ինչպես եղել է, այնպես էլ մնացել է, եթե համարենք, որ 2012-ի ընտրացուցակի հետ կապված ինչ-որ հարցեր եղան, ապա դրանք դեռ կքննարկվեն: Ամեն դեպքում, 2017 թվականի հետ կապված որեւէ որոշում չկա, որովհետեւ «Ժառանգությունն» այս պահին «Նոր Հայաստանին» է միացել ու պայքարում է արտահերթ ընտրությունների, իշխանափոխության համար: Վերակազմավորվելու հարց կծագի այն ժամանակ, երբ ընտրացուցակի հարց առաջանա»,-նշեց նախկին պատգամավորը:
Նա ընդգծեց, որ իրենց համար հիմա առաջնահերթ են արտահերթ ընտրությունները:
«Ռեսթարթի կարիք «ժառանգությունում» չկա, քանի որ կուսակցությունում որեւէ էական փոփոխություն չկա: Կարող է մի քանի պատգամավորի հետ կապված խնդիր եղել է, բայց կուսակցությունում ռեսթարթի խնդիր ծրագրային առումով չկա: Գործունեության հետ կապված` հնարավոր է: Կարծում եմ` առաջիկայում կերեւա: Բայց մեր ուժերը կենտրանացած են «Նոր Հայաստանի» շրջանակում գործունեություն ծավալելուն եւ ձգտում ենք հասնել արտահերթ ընտրության»,-ասաց Արմեն Մարտիրոսյանը: