Թուրքական Star-ի թղթակիցը հայ-թուրքական հարաբերությունների եւ Աղթամարի Ս. Խաչի հետ կապված, զրուցել է Պոլսո հայոց պատրիարքական ընդհանուր փոխանորդ արքեպիսկոպոս Արամ Աթեշյանի հետ։
Ինչպե՞ս կմեկնաբանեք այն փաստը, որ հայկական եկեղեցին բոյկոտել է Աղթամարի Ս. Խաչի պատարագը։
Պատարագի թույլտվությունը կա, դա արդեն մեծ զարգացում է։ Խաչի տեղադրումն է հետաձգվել։ Մեր իշխանավորները չեն ասում, թե չի տեղադրվելու։ Պատարագի օրը խաչը կտեղադրվի եկեղեցու դիմաց եւ կցուցադրվի հյուրերին։ Պետությունը խոստացել է պատարագից հետո տեղադրել խաչը։
Արտասահմանից այցելուների մեծ հոսք էր սպասվում, սակայն թիվը նվազել է։ Սպասում էինք 5 հազար, բայց այդ թիվը իջել է 2 կամ 2,5 հազարի։ Համայն հայության հոգեւոր առաջնորդը եւս բոյկոտում է։ Այդ պատճառով, ժամանողների քանակը կիսվել է։ Շատերն ասում են՝ «խաչը չտեղադրվեց, չենք գա»։ Ստամբուլի հայ համայնքը կմասնակցի պատարագին։
Ինչպե՞ս կմեկնաբանեք Հայաստանի հետ հարաբերությունների կարգավորման նախաձեռնությունը։
Հարեւանների հետ հարաբերությունների կարգավորման նախաձեռնություն եղավ, սակայն Հայաստանի հետ՝ չեղավ։ Սիրիայի, Ռուսաստանի, Լիբանանի հետ փոխադարձ վիզաները հանվեցին, ճանապարհները բացվեցին։ Չեմ կարող ասել, թե Հայաստանի հետ հարաբերությունների կարգավորումը մտել է փակուղի, թե` չէ։ Երկու երկրների միջեւ չկան դիվանագիտական հարաբերություններ։ Անհրաժեշտ է սահմանների բացման համար առանց նախապայմանների համաձայնագիր ունենալ։ Անհրաժեշտ է վերացնել մուտքի վիզան եւ բացել սահմանները։ Առանց վիզաները հանելու եւ սահմանները բացելու, հաջողության չես հասնի։ Թող սահմանները բացվեն, ժողովուրդը հանգիստ գնա-գա։ Բարեկամության մեջ, առաջինը դա ես պատկերացնում։ Նախ, պետք է թույլ տալ ժողովրդին իրար կողք լինել: