UNESCO-ն Երեւանը հայտարարել է 2011 թվականի գրքի մայրաքաղաք, սակայն ճակատագրի հեգնանքով, Հայաստանում ամենաքիչ պահանջարկ ունեցող ապրանքը գիրքն է։ Սեպտեմբերի 14-ին Ազգային ժողովի ամբիոնից հայտարարեց ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը։
«Ես այսօր չեմ ուզում խոսել սրճարանների կամ էլ սննդամթերքի վաճառակետերի վերածված գրախանութների մասին։ Ես ուզում եմ կանգ առնել կոնկրետ խնդրի՝ Ազգային գրապալատի վրա։ Վերջերս ինձ բախտ վիճակվեց լինել այնտեղ։ Ազգային գրապալատը շատ ավելի վատ վիճակում է , քան Դրեզդենը երկրոդ համաշխարհային պատերազմի ժամանակ. տանիքը հոսում է, մանրահատակ գրեթե չկա, ողջ ֆոնդը ծածկված է պոլիէթիլենով՝ խոնավությունից ինչ-որ կերպ պաշտպանելու համար։ Եւ պատահական չէ, որ այդ պայմաններում ֆոնդի նշանակալից մասը փչացել է»,- ասաց Նաիրա Զոհրաբյանը։
Նա առաջարկեց կառավարությանը 2011 թվականի բյուջեից առանձին գումար տրամադրել Ազգային գրապալատի վերանորոգման համար։ «Հակառակ դեպքում, խոստանում եմ, որ անձամբ եմ Հայաստան այցելած հյուրերին այնտեղ էքսկուրսիա տանելու»,- նշեց պատգամավորը։