Պոլսո հայոց պատրիարքարանը մերժել է Վանի նահանգի թուրք գործարարների առաջարկը՝ Աղթամարի Սուրբ Խաչ եկեղեցու վրա փայտե խաչ տեղադրելու մասին:
Ինչպես NEWS.am-ին հայտնում են Վանի աղբյուրները, նահանգի գործարարներն այսօր՝ սեպտեմբերի 14-ին դիմել են Պոլսո պատրիարքարանին եւ խնդրել փայտե ժամանակավոր խաչ տեղադրել, քանի որ չեն հասցնում մետաղյա խաչը տեղադրել եկեղեցու գմբեթին: Թուրք գործարարները, ովքեր շահագրգռված են Վանի Աղթամար կղզում սեպտեմբերի 19-ի պատարագի անցկացմամբ, հայտնել են, թե չեն հասցնի մինչեւ պատարագի օրը մետաղե խաչը տեղադրել, եւ խաչի խորհուրդը պահպանելու համար լավ կլինի փայտե խաչ դնել եկեղեցու գմբեթին:
Պոլսո Պատրիարքարանը, սակայն, մերժել է թուրք գործարարներին եւ խստորեն հայտնել, որ արգելում է Աղթամարի Սուրբ Խաչ եկեղեցու գմեթին փայտե խաչի տեղադրումը:
NEWS.am-ը փորձեց լուրի իսկությունը ճշտել Պոլսո պատրարքարանից: Պատրիարքարանից Հայր Թաթուլը հայտնեց, որ նման առաջարկի մասին ինքը տեղյակ չէ: «Առաջարկ կար, որ պետք է տեղադրվեր երկաթյա խաչը, սակայն դրա տեղադրումը երկար աշխատանք է պահանջում»: Հարցին, թե հնարավոր է, որ առաջարկ եղել է, սակայն պատրիարքարանը տեղյակ չէ, Հայր Թաթուլը պատասխանեց. «Եթե անգամ այսպիսի առաջարկ է արվել, այն տրամաբանական չէ, որ ընդունելի լինի մեզ համար, որովհետեւ փայտե դրվելիք խաչը հետո կլիմայի հետ կապված տեղահանվելիք խաչ է լինելու: Պիտի տեղադրել երկաթյա խաչը՝ իր բնական ընթացքով: Ի՞նչ է նշանակում՝ նախ փայտե խաչ դնել, հետո այն հանել ու ուրիշը դնել»:
Ի դեպ, Հայր Թաթուլն ասաց, որ NEWS.am-ի թղթակցի հետ զրույցից րոպեներ անց մեկնելու է Վան:
Նշենք, որ թուրք գործարարները հայտնել են, թե ամեն ջանք գործադրելու են՝ եկեղեցու գմբեթին մինչեւ պատարագ խաչը տեղադրելու ուղղությամբ:
