Ադրբեջանում Միացյալ Նահանգների դեսպանի թեկնածու, ԵԱՀԿ Մինսկի խմբի նախկին համանախագահ Մեթյու Բրայզան Ադրբեջանի իշխանություններին պատասխանատու է համարել Հին Ջուղայի 1300-ամյա հայկական գերեզմանատանը տեղի ունեցած ավերումների ու պղծումների համար:
ԱՄՆ դեմոկրատ սենատոր Բարբարա Բոքսերը հավելյալ պարզաբանումների համար հարցեր է հղել դեսպանի թեկնածուին, որոնցից մեկն էլ վերաբերել է Հին Ջուղայի դեպքերին: Պատասխանելով մեղավորների մասին հարցին՝ Բրայզան դիվանագիտորեն նշել է. Ինձ թվում է, որ տեղի ունեցածի համար պատասխանատու են Ադրբեջանի իշխանությունները»:
Անդրադառնալով հունիսի 18-ին Ղարաբաղյան հակամարտության շփման գծում տեղի ունեցած արյունալի միջադեպին, որի արդյունքում հայկական կողմից զոհվել էր չորս զինծառայող, ադրբեջանական կողմից՝ մեկ, Բրայզան ասել է. «Թեեւ ես ասացի, որ միջադեպը տեղի է ունեցել ադրբեջանական զորքերի՝ շփման գիծը հատելու հետեւանքով, սակայն, առայժմ անհայտ են բոլոր այն մանրամասները, որոնք հանգեցրել են այդ ողբերգական միջադեպին»:
«Իմ նախկին պաշտոնավարման ընթացքում՝ որպես Մինսկի խմբի համանախագահ եւ փոխպետքարտուղարի տեղակալ, ես շարունակաբար դատապարտել եմ պատերազմի վերսկսման բոլոր սպառնալիքները, ընդգծել եմ, որ հակամարտությունը ռազմական լուծում չունի, եւ, եթե հաստատվեմ Ադրբեջանում ԱՄՆ դեսպանի պաշտոնում՝ կշարունակեմ խստորեն առաջ տանել այս ուղերձը»,- ասել է Բրայզան եւ ընդգծել, որ ղարաբաղյան հակամարտության կարգավորումը, տարածքային ամբողջականությունից բացի, պետք է ներառի նաեւ միջազգային իրավունքի այլ սկզբունքներ՝ ազգերի ինքնորոշումն ու ուժի կամ ուժի սպառնալիքի չկիրառումը։
Ամերիկայի Ամերիկայի Հայ դատի հանձնախմբի Վաշինգտոնի գրասենյակի ղեկավար Արամ Համբարյանը, մեկնաբանելով Մեթյու Բրայզայի պատասխանները, նկատել է, որ նա շարունակումէ խուսափողական պատասխաններ տալը՝« ավելի ու ավելի վատ դրության մեջ դնելով իրեն եւ ցույց տալով, թե որքան սխալ է նրա թեկնածությունը Ամերիկայի Միացյալ Նահանգների դեսպանի պաշտոնում»:
