Բրազիլիայի մայրաքաղաքի կոմունալ ծառայությունները Ռիո դե Ժանեյրոյի պարահանդեսի ժամանակ յուրատեսակ ռեկորդ են սահմանել՝ տոնակատարությունների առաջին օրում հավաքելով 136 տ աղբ: Հավաքարարները, աղբատար մեքենաների վարորդները ու այդ ոլորտի մյուս աշխատողներն այս ժամանակահատվածում աշխատում են շուրջօրյա ռեժիմով, որն ինչ -որ տարերային աղետի հաջորդող հատուկ գործողություն է հիշեցնում:
Քաղաքի մաքրության համար պատասխանատու մունիցիպալ ընկերությունը դիմակահանդեսի ընթացքում ձեռնարկվող բոլոր միջոցառումներին նույնիսկ հատուկ անուն է տվել՝ «մեգա մաքրություն»: Այդ «մեգա մաքրությանն» օրական 1100 հավաքարար է մասնակցում, ավելի քան100 միավոր հատուկ տեխնիկա, հայտնում է RG–ն:
Չնայած տնտեսական ճգնաժամին ու բյուջեի դեֆիցիտին՝ այս տարի իշխանություններն ուշադրություն են դարձրել նաեւ տոնակատարության բնապահպանական ասպեկտներին: Տեղադրվել են 5 հազար հատուկ աղբամաններ որոնք տարանջատված են ըստ աղբի տեսակի: Բնակչության շրջանում հատուկ բացատրական աշխատանքներ են իրականացվել:
Անդրադառնալով դիմակահանդեսի կազմակերպման սանիտարական ու հիգիենիկ կողմերին՝ հարկ է նշել, որ կազմակերպիչները հաշվի են առնում նախորդ տարիների փորձը ու կատարելագործում տոների նախապատրաստական աշխատանքները: Օրինակ այս տարի ավելացրել են ժամանակավոր հանրային զուգարանների քանակը: Խստացվել է հանրային վայրերում կարիքները հոգալու մասին օրենսդրությունը: Վերջին մեկ օրում այդ կանոնները խախտելու համար տուգանվել է 579 մարդ՝ յուրաքանչյուրը 510 ռեալով:
