Գյումրիում փետրվարի 7-ին ավազակային հարձակման ժամանակ գլխուղեղի ու կրծքավանդակի վնասվածքներ ստացած 67-ամյա Վալյա Սուքիասյանն իրեն արդեն լավ է զգում թե ֆիզիկապես, թե հոգեպես: NEWS.am-ի հետ զրույցում նա պատմեց դեպքի մանրամասները:
«Առավոտ ելա, ձյունը մաքրի, ուզում էի ներս մտնել՝ մեկը ելավ շալակս, ըսեց՝ ինչ ունիս-չունիս՝ ոսկիներդ, փողերդ տուր: Ծեծեց, ջարդուխուրդ էրավ, քցեց գողինք, անշնորհք տղա էր»,- պատմեց 67-ամյա կինը՝ նշելով, որ իր կարծիքով հարվածը իրեն դանակի բութ մասով են հասցրել:
Թոշակառու տիկին Վալյան պատմեց, որ տանը ոսկեղեն չի ունեցել, 63 հազար դրամ է ունեցել, որն ավազակային հարձակում կատարողը գողացել է: Տիկին Վալյան տղամարդուն չի ճանաչել, քանի որ նա դիմակով է եղել:
«Մենակ գիտեմ որ բոյով, նիհար էր: Մենակ աչքերը տեսա, չեմ կարա ասեմ՝ ով էր»,- ասաց նա:
Միայնակ ապրող կինը պատմեց, որ երբեք մտքով չի անցել, որ կարող է նման բան պատահել, տան դուռը երբեք չի կողպել:
Դեպքից հետո տիկին Վալյային օգնության են հասել հարեւանները, որոնք «Շտապօգնություն» են կանչել ու կնոջը տեղափոխել հիվանդանոց:
Հարեւանուհին դժգոհեց, որ իրենց ամբողջ ընտանիքին ժամերով պահել են ոստիկանությունում՝ հարցաքննության համար:
«Բոլորին՝ ահել-ջահել հավաքեցին, տարան: Հիվանդ ամուսին ունեմ, 12 տարեկան աղջկաս էլ հետս տարան: Առավոտից մինչեւ երեկոյան ժամը 10-ը աղջիկ երեխիս հետ նստած եմ եղել ոստիկանությունում: Ստիպված՝ տեսա, որ հնար չկա, ասեցի՝ աղջիկս սոված-ծարավ է, թողեք՝ գնանք»,- պատմեց Նառա անունով հարեւանուհին:
Նշենք, որ ավազակային հարձակումը կատարելու մեջ արդեն կասկածյալ կա՝ Գյումրիի բնակիչ, 1986 թ. ծնված Կ.Կ-ն, որը ձերբակալված է: Նա ինքնախոստովանական ցուցմունք է տվել, պատմել, թե ինչպես է դեպքը տեղի ունեցել:
