Թուրքիայի վարչապետ Ռեջեփ Թաիփ Էրդողանն Աղթամարի Սուրբ Խաչ եկեղեցու պատարագի մարդաշատությունն ապահովելու համար դիվանագիտական ժեստ է արել՝ էլեկտրոնային փոստով հրավեր ուղարկելով Հայաստանի հասարակական-քաղաքական սեկտորի ներկայացուցիչներին՝ առաջարկելով նրանց մասնակցել սեպտեմբերի 19-ին տեղի ունենալիք Սուրբ Խաչ եկեղեցու պատարագին: Նրանց մի մասը, մասնավորապես հասարակական կազմակերպությունների ղեկավարները, մերժել են հրավերը: NEWS.am-ը փորձեց պարզել, թե Հայաստանի քաղաքական գործիչներից, հատկապես, ովքե՞ր են ստացել Էրդողանի հրավերը: ԱԺ ՀՀԿ խմբակցության քարտուղար Էդուրադ Շարմազանովն ասաց, որ խմբակցության պատգամավորները Թուրքիայի վարչապետի կողմից որեւէ հրավեր չեն ստացել: Նույն խմբակցության մեկ այլ պատգամավոր՝ Կարեն Ավագյանն էլ, արձագանքելով Էրդողանի նախաձեռնությանը՝ նկատեց. «Երբ ես Արեւմտյան Հայաստան գնալու եւ պատարագին մասնակցելու մտադրություն ունենամ, Էրդողանի հրավերին չեմ սպասի: Որովհետեւ, եթե այդ երկիրը ոմանց համար Թուրքիա է, ապա ինձ համար Արեւմտյան Հայաստան է: Եթե հազար տարի էլ Վանը մնա այսօրվա Թուրքիայի տարածքում, մենք այդտեղ ունենք պատմական հողեր, որոնք այսօրվա հայի, հայաստանցու համար պետք է լինեն Արեւմտյան Հայաստան»:
ԱԺ ՀՅԴ խմբակցության քարտուղար Արտյուշա Շահբազյանն էլ ասաց, որ անձամբ ինքը որեւէ հրավեր չի ստացել, եւ որքանով իրեն է հայտնի՝ նման հրավեր չեն ստացել նաեւ խմբակցության մյուս պատգամավորները: «Թուրքերը մեզ ատում են, եւ դա բնական է: Այդ առումով զարմանալի չէ, որ մեզ հրավեր չեն ուղարկել, քանի որ գիտեն, եթե ուղարկեն, ինչ արձագանքի կարժանանան»,-նշեց Շահբազյանը:
«Ժառանգություն» խմբակցության պատգամավորները նույնպես հրավեր չեն ստացել: Խմբակցության քարտուղար Ստյոպա Սաֆարյանն ասաց, որ եթե անգամ ստանային, ապա միանշանակ մերժելու էին: «ՄԱԿ-ի անվտանգության խորհրդում մեզ օկուպանտ ճանաչել սպառնացող մարդուց ստացված հրավերը չի կարող լավ ընդունվել: Մենք հավաում ենք իր այն անկեղծությանը, թե ցանկանում է Հայաստանին դաս տալ, բայց այն, որ ինքն ուզում է Հայաստանի հետ իր հարաբերությունները կարգավորել, դրան չենք հավատում»,-ասաց Սաֆարյանը:
Պատարագին մասնակցելու հրավեր չեն ստացել նաեւ ԱԺ մյուս երկու խմբակցությունները՝ ՕԵԿ-ն ու ԲՀԿ-ն:
Հիշեցնենք, որ Աղթամարի Սուրբ Խաչ եկեղեցում պատարագ կմատուցվի սեպտեմբերի 19-ին:
