Առաջիկայում ՀՀԿ-ՀՅԴ համագործակցության ձեւաչափի մասին առանձին հայտարարություններ կարվեն: Այս մասին այսօր` փետրվարի 15-ին, լրագրողների հետ հանդիպմանն ասաց ԱԺ ՀՀԿ խմբակցության քարտուղար Գագիկ Մելիքյանը:
«Նախնական պայմանավորվածություն ձեռք է բերվել, այդ մասին պաշտոնապես հայտարարվել է արդեն: Այս առումով շատ եմ կարեւորում նախագահի ծրագրային ելույթը: Կարծում եմ` առաջիկայում ՀՀԿ-ՀՅԴ համագործակցության ձեւաչափի մասին արդեն հայտարարություններ կարվեն»,- ասաց Գագիկ Մելիքյանը` ժամկետներ չնշելով:
Հիշեցնենք, որ ՀՀԿ-ն եւ ՀՅԴ-ն բանակցում են կոալիցիա ստեղծելու շուրջ: Փետրվարի 10-ին ՀՀԿ մամուլի քարտուղար Էդուարդ Շարմազանովը ՀՀԿ ԳՄ նիստից հետո հայտարարել էր, որ ՀՀԿ-ի եւ ՀՅԴ-ի միջեւ կա համագործակցության շուրջ նախնական համաձայնություն, սակայն վերջնական համաձայնության մասին դեռ հայտարարություն չի արվել: Մամուլում արդեն շրջանառվում են լուրեր, որ ՀՅԴ-ին տրվելու է նախարարի երեք եւ մարզպետի երկու պորտֆել:
