Ստամբուլի օդանավակայանում հայ լրագրողների խմբի հետ տեղի ունեցած միջադեպը չի բացառվում, որ կապված լինի Աղթամարի Սուրբ Խաչ եկեղեցում մատուցվող պատարագին Հայաստանի հասարակության վերաբերմունքի հետ: Այս մասին սեպտեմբերի 18-ին, լրագրողների հետ հանդիպման ժամանակ հայտարարեց լրագրողների խմբին Ստամբուլ՝ սեմինարի մասնակցելու ուղեկցած Երեւանի մամուլի ակումբի ղեկավար Բորիս Նավասարդյանը: Նրա խոսքով, քանի որ Հայաստանից հրաժարվեցին մասնակցել պատարագին, թուրքական կողմը որոշեց արձագանքել դրան, որի դրսեւերումներից մեկն էլ Հայաստանի քաղաքացիների նկատմամբ օդանավակայանում «առանձնահատուկ» վերաբերմունք ցուցաբերելն է: «Երբ փաստորեն ստացվեց, որ բավականին շատ հայեր, որոնք պլանավորում էին մասնակցել այդ միջոցառմանը, հրաժարվեցին այդ պլաններից, չեմ բացառում, որ իշխանության որեւէ օղակում որոշվեց ցույց տալ, որ եթե չեք գալիս այդ միջոցառմանը, ապա մենք ընդհանրապես համարում ենք, որ դուք ցանկալի հյուրեր չեք մեր երկրում»,-ասաց Նավասարդյանը: Նա նշեց, որ օդանավակայանում անձնագրերի հետ կապված ստուգումներ իրականացվել են նաեւ իրենց չվերթին նախորդած մի քանի չվերթների ժամանակ, սակայն աղմուկ չի բարձրացվել: Բորիս Նավասարդյանը հույս հայտնեց, որ իշխանության այն օղակը, որը Թուրքիայում որոշել է այդպիսի ցուցադրական վերաբերմունք դրսեւորել հայերի նկատմամբ, տեղի ունեցածից հետո կփոխի իր դիրքորոշումը: «Քանի որ դա, ամեն դեպքում, Թուրքիայի, որպես պետության, իմիջի համար բարենպաստ զարգացում չէ»,-նկատեց ԵՄԱ նախագահը:
NEWS.am-ը փորձեց ճշտել, թե, արդյոք, Թուրքիայի վարչապետ Էրդողանը Նավասարդյանին է՞լ է ուղարկել Սուրբ Խաչի պատարագին մասնակցելու հրավեր՝ ի թիվս հայաստանյան այլ հասարակական կազմակերպությունների ղեկավարների: Բորիս Նավասարդյանը չբացառեց, որ գուցե հրավեր եղել է, բայց քանի որ ինքը չունի այդ պատարագին մասնակցելու մտադրություն, գուցե չի նկատել ուղարկված նամակն ու ջնջել է՝ առանց ուշադրություն դարձնելու:
Հիշեցնենք, որ սեպտեմբերի 13-ի առավոտյան, Ստամբուլի օդանավակայանի թուրք աշխատակիցները մի քանի ժամ պահել էին հայ լրագրողներին եւ թույլ չէին տվել մուտք գործել Թուրքիա: Հայ լրագրողները մեկնել էին Թուրքիա` մասնակցելու «Մեդիայի դերը ղարաբաղյան հակամարտությունում եւ տարածաշրջանային անվտանգության եւ համագործակցության բարելավումը» սեմինարին: Անձնագրերի ստուգման ժամանակ, Թուրքիա ժամանած հայ լրագրողներից, ինչպես նաեւ մյուս հայ ուղեւորներից թուրք սահմանապահները վերցրել էին անձնագրերը եւ այլ ստուգումների ենթարկել: Միջադեպը հարթվել էր, երբ գործին միջամտել էին սեմինարի կազմակերպիչ թուրքական կողմի ներկայացուցիչները: Սեմինարը կազմակերպել են Երեւանի մամուլի ակումբը, Ֆրիդրիխ Էբերտ հիմնադրամը, ադրբեջանական «Յենի Նեսիլ» լրագրողների միությունը եւ Global Political Trends Centre-ը:
