Թուրքիայի Աղթամար կղզու Սուրբ Խաչ հայկական եկեղեցում առաջին անգամ բացվել է քանդակագործության ցուցահանդես, որը կազմակերպել է «Յուհլունչու յըլ» համալսարանը:
«Աղթամար» անունով ցուցահանդեսը բացել է Վանի նահանգապետ Մյունիր Քարայօղլուն` թուրքական տարբեր բուհերի պրոֆեսորա-դասախոսական կազմի մասնակցությամբ: Կիթառի եւ ջութակի հնչյունների ներքո արվեստի սիրահարները կարող են հիանալ 17 քանդակագործների աշխատանքներով, հաղորդում է Haberler-ը:
Հիշեցնենք, որ սեպտեմբերի 19-ին Աղթամարի Սուրբ Խաչ եկեղեցում առաջին անգամ պատարագ է մատուցվելու: Թեեւ թուրքական կողմը նախապես խոստացել էր մինչ պատարագը խաչ տեղադրել եկեղեցու գմբեթին, սակայն հետո հայտարարեց, որ չի հասցնում դա անել եւ խաչը կտեղադրվի պատարագից հետո: Սա առիթ դարձավ, որ Մայր Աթոռ սուրբ Էջմիածինը, Մեծի տանն Կիլիկիո կաթողիկությունն ու Երուսաղեմի պատրիարքությունը հրաժարվեն պատարագին մասնակցությունից: