![](img/news/03/14/65/default.jpg)
Ցեղասպանության թանգարան-ինստիտուտի եւ «Մենք» երիտասարդական շարժման նախաձեռնությամբ Ծիծեռնակաբերդում պատարագ է մատուցվել եւ թուրքական կառավարության՝ Վանի Աղթամար կղզու Սուրբ Խաչ եկեղեցու շուրջ քարոզչական գործողությունների դեմ ցույց է անցկացվել։ (ֆոտոռեպորտաժ)
Բազմամարդ երթը, որին մասնակցել են հասարակական կազմակերպությունների, պետական կառույցների ներկայացուցիչներ, հասարակ քաղաքացիներ եւ ազգային փոքրամասնությունների ներկայացուցիչներ, դեպի Ծիծեռնակաբերդի հուշահամալիր իր վերելքն սկսել է «Մեր եկեղեցին մեզ մի տվեք պարտքով», «Թուրքիա, կատարիր քո միջազգային պարտավորությունները» ցուցապաստառներով եւ «ամոթ» բացականչություններով։
«Մենք» երիտասարդական շարժման ղեկավար Հակոբ Հակոբյանն իր ելույթում նշել է, որ ժամանակակից Թուրքիան իր վարքով հերթական անգամ ցույց է տալիս, որ չի փոխվել եւ շարունակում է կեղծել պատմությունը։ «Թուրքիան Սուրբ Խաչի պատարագով ցանկանում է բոլորին ցույց տալ իր ժողովրդավարությունը, սակայն թուրքական կառավարությունը ի վիճակի չէ իր արյունոտ ճակատից մաքրել «ամոթ» բառը»,- ասել է նա։
Ծիծեռնակաբերդում պատարագ է մատուցվել, որը սկսվել է Վանի Սուրբ Խաչ եկեղեցում ընթացող պատարագի հետ միաժամանակ։
Նշենք, որ Աղթամարի Սուրբ Խաչ եկեղեցում ավարտված պատարագին մասնակցել է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի:
Լուսանկարը եւ տեսանյութը՝ Գագիկ Շամշյանի