Վանի Աղթամար կղզու Սուրբ Խաչ եկեղեցու գմբեթին խաչ չտեղադրելը նույնքան սխալ էր, որքան նոր մզկիթների կառուցման արգելքը եվրոպական մի շարք երկրներում։ Այս մասին «Sunday’s Zaman» պարբերականին հայտարարել է Թուրքիայի իշխող «Արդարություն եւ զարգացում» կուսակցության փոխնախագահ Հուսեն Չելիքը։
«Խաչ չտեղադրելը նույնքան սխալ էր, որքան նոր մինարեթների կառուցումը եվրոպական մի շարք երկրներում։ Երբ հասարակությունը հանրաքվեի միջոցով չաջակցեց մինարեթների կառուցմանը, մենք շատ տխուր էինք եւ վրդովված։ Չի կարող խոսք լինել այն մասին, որ մենք գործել ենք նույն կերպ»-ասել է Չելիկը։
Նշելով, որ 900-ամյա Սուրբ Խաչ եկեղեցին ունի միեւնույն մեծ նշանակությունը, ինչ որ Եփեսոս ու Պերգամոնը, Չելիքն ասել է, որ խաչը քրիստոնյաների համար այն նշանակությունն ունի, ինչ որ կիսալուսինը մահմեդականների համար։
«Ինչպես որ կարեւոր են մեր մզկիթների տարրերը, այնպես եւ խաչը կարեւոր է եկեղեցիների դեպքում։ Այս հարցն այնքան պարզ է, որ պահանջում է մեր սրտակցությունը։ Խաչի չտեղադրելը Սուրբ Խաչի վրա սխալ է այնքան, որքան մզկիթի վրա կիսալուսին չդնելը։ Խաչի ներկայությունից մենք ոչինչ չենք կորցնում, սակայն նրա բացակայությունից ոչինչ չենք շահում»,- բացատրել է Չելիքը։
Նա նաեւ առաջարկել է, որ տարվա ընթացքում Աղթամար կղզում պատարագներ անցկացվեն։
