Եթե Թուրքիան պետք է վերանորոգի հայկական եկեղեցիներն ու թանգարանի վերածի, ապա թող չվերանորոգի, քանի որ դա կնշանակի նորոգված կառույցի բռնագրավում: Այս մասին լրագրողների հետ հանդիպման ժամանակ հայտարարեց ՀՅԴ Հայ դատի եւ քաղաքական հարցերի գրասենյակի պատասխանատու Կիրո Մանոյանը: Նա նշեց, որ Թուրքիայի տարածքում գտնվող բոլոր կալվածքներն ու հուշակոթողները պատկանում են հայությանը եւ այդ ունեցվածքի իրավատերը Օսմանյան կայսրությունում եղել են երկու իրավաբանական անձինք՝ Թուրքիայի Հայոց պատրիարքարանն ու Մեծի Տանն Կիլիկիո կաթողիկոսությունը:
NEWS.am-ի հարցին, թե Դաշնակցությունը, լինելով պահանջատեր, պատրաստվո՞ւմ է ֆինանսավորել Թուրքիայում գտնվող հայկական հուշակոթողների վերականգնումը, Մանոյանն արձագանքեց. «Պահանջատեր լինել չի նշանակում, որ կուսակցությունը պիտի ինքը ֆինանսավորի հուշակոթողների վերականգնումը: Պահանջատեր լինել, նշանակում է, որ ամբողջ իրավունքները, որոնք որ մինչեւ այսօր Թուրքիայի կողմից ոտնահարվել են, այդ իրավունքների հետապնդման խնդիր կա: Իսկ վերանորոգութան հարցը կասեի, որ Թուրքիայի պարտավորության հարցն է»: Ըստ Մանոյանի՝ եթե Դաշնակցությունը ֆինանսավորի հուշակոթողների վեչականգման աշխատանքները, դրանով այդ հարցը կքաղաքականացվի: «Բայց պահանջել, որ Թուրքիան պարտավոր է նորոգել այն, ինչը կարելի է փրկել, դա քաղաքական կեցվածք է, որը մենք կորդեգրենք»,-նշեց նա:
NEWS.am-ի ճշտող հարցին, թե Թուրքիան ինչ-որ ատյանի առաջ պարտավորությո՞ւն է ստանձնել՝ հայկական հուշակոթողները վերականգնելու համար, դաշնակցական գործիչն արձագանքեց. «Անշուշտ: Թուրքիան Լոզանի պայմանագրով պարտավորություն ունի թույլ տալ ոչ իսլամական ազգային փոքրամասնություններին պահպանել իրենց կրոնական պաշտամունքի վայրերը: Դա չի նշանակում, որ պետությունը պիտի նորոգի: Բայց պետությունն այդ իրավունքը այդ մարդկանց ձեռքից առնվազն 70 –ական թվականներից վերցրել է»: Նա նաեւ հավելեց, որ Թուրքիան պարտավոր է պատասխանատվություն կրել այն հուշակոթողների համար, որոնք քանդել է անցած տարիների ընթացքում՝ 1915 թվականից հետո:
