Հայաստանի իշխանությունները քարշ են տալիս իրենց գոյությունը երկրի անկախության կորստի հաշվին: Այդ մասին սեպտեմբերի 20-ին կայացած մամուլի ասուլիսում հայտնել է Հայոց Համազգային Շարժում կուսակցության վարչության նախագահ Արամ Մանուկյանը:
Նրա խոսքով, Հայաստանի դիրքերը միջազգային ասպարեզում թուլացել են, երկրի ինքնիշխանությունը գտնվում է վտանգի տակ: Դա վկայող հիմնական գործոնն, ըստ Մանուկյանի, արտագաղթն է: «Որեւէ անկախության մասին խոսք լինել չի կարող, եթե ժողովուրդը զանգվածաբար լքում է երկիրը: Երբ պատերազմ էր, սով, ցուրտ, ավերածություններ, դա դեռ հասկանալի է, բայց այժմ մարդիկ ունեն ամեն ինչ, ինչից զրկված էին այն ժամանակ, բայց այդուհանդերձ արտագաղթը թափ է հավաքում»,- ասել է Մանուկյանը:
Նա նշել է նաեւ, որ հայ ժողովուրդն անպաշտպան եւ անվստահ է վաղվա օրվա նկատմամբ: Ընդդիմադիր գործչի կարծիքով, ժողովուրդը դժգոհ է, որ երկիրը կառավարում են հաստագլուխները, իսկ խորհրդարանում անկիրթ դեմքեր են: «Այն, ինչ չկա երկրում, մեկ ընդհանուր օրենքն է բոլոր համար եւ ժողովրդավարությունը: Փոխարենը մենք քաղբանտարկյալներ ունենք, մարդիկ ովքեր պայքարել են Հայաստանի անկախության համար»,- ընդգծել է Արամ Մանուկյանը:
ՀՀՇ վարչության նախագահն արձանագրել է նաեւ, որ վերջին տասը տարում Հայաստանի իմիջը զգալի անկում է ապրել: Բոլոր ցուցանիշներով, ներառյալ ժողովրդավարությունը, խոսքի ազատությունն ու մարդու իրավունքները, փոքր եւ միջին բիզնեսի զարգացումը, Հայաստանը 40 տոկոս անկում է գրանցել: «Եթե նախկինում Հայաստանը գտնվում էր 75-90-րդ տեղերում, այսօր իջել է 125-130-րդ տեղերը»,- ասել է նա:
