Երեւանում այսօր՝ ապրիլի 24-ին կայացել է «Ավրորա» մրցանակաբաշխությունը, որին մասնակցում են նախագահ Սերժ Սարգսյանը, աշխարհահռչակ շանսոնյե Շարլ Ազնավուրը, հոլիվուդյան աստղ Ջորջ Քլունին, պաշտոնյաներ, դիվանագետներ, հյուրեր աշխարհի տարբեր երկրներից։
Aurora Prize մրցանակաբաշխությունը ստեղծվել է, որպեսզի Ցեղասպանությունը վերապրած բոլոր հայերի անունից շնորհակալություն հայտնի փրկիչներին: Հարյուր տարի առաջ նրանց դրսեւորած քաջության հիշատակին մրցանակով պարգեւատրվելու են ժամանակակից հերոսները, որոնք վտանգում են իրենց կյանքը հանուն ուրիշների փրկության:
Մրցանակն այս տարի չորս հավակնորդներ ունի։ Նրանք են Մարգարեթ Բարանքիթսը, որը «Մեյսոն Շալոմ» որբանոցի հիմնադիրն է: Նշենք, որ 1990-ականներին հիմնադրված այս որբանոցը նախատեսված է Բուրունդիիի, Ռուանդայի եւ Կոնգոյի դեմոկրատական հանրապետության երեխաների համար: Երկրորդ հավակնորդը նյույորքցի բժիշկ Թոմ Քաթենան է, որը Սուդանում 8 տարի առաջ հիմնել է բարեգործական բժշկական կենտրոն:
«Ավրորայի» մյուս հավակնորդը Սյեդա Ղուլամ Ֆաթիման է, որը Պակիստանում հիմնել է կազմակերպություն, որի նպատակն է օգնել աղքատ ընտանիքներին՝ ազատվելու պարտքերից:
Մրցանակի 4-րդ հավակնորդը հոգեւորական Բերնարդ Քինվին է, որը Կենտրոնաֆրիկյան Հանրապետությունում մահացու հետապնդումից փրկել է հարյուրավոր կանանց եւ երեխաների:
Հաղթողի անունը հայտնի կդառնա այսօր, իսկ մրցանակը կհանձնի Ընտրող հանձնաժողովի համանախագահ, հայտնի դերասան Ջորջ Քլունին, որը հենց այդ նպատակով ապրիլի 22-ին ժամանել է Հայաստան:
Նշենք, որ «Ավրորա» մրցանակը շնորհելով՝ 100 LIVES նախաձեռնությունը ճանաչման է արժանացնում մերօրյա հերոսներին, որոնք անձնվիրաբար օգնում են մարդկանց: Այն հիմնել են հայ գործարարներ Ռուբեն Վարդանյանը, Նուբար Աֆեյանն ու Կարնեգի կորպորացիայի նախագահ Վարդան Գրեգորյանը: