Երեւանի քաղաքապետ Տարոն Մարգարյանն այսօր՝ ապրիլի 26-ին այցելեց Երեւանի «Սուրբ Աստվածամայր» բժշկական կենտրոնում գտնվող, ավտոբուսի պայթյունից տուժած 2 դեռահասներին:
«Հենց լավանաք, միասին գնալու ենք «Թումո», որ տեսնենք՝ ինչ էիք էնտեղ անում»,- տղաներին ասաց քաղաքապետը:
Էդգարն ու Ռոլանդը քաղաքապետին ասացին, որ իրենց լավ են զգում:
Նշենք, որ 2002թ. ծնված Էդգար Գասպարյանը եւ 2001թ. ծնված Ռոլանդ Խոջայանը ունեն բեկորային վիրավորումներ, վնասվածքներ եւ այրվածքներ։ Նրանց «Արմենիա» ԲԿ-ից այսօր են տեղափոխել «Սուրբ Աստվածամայր» ԲԿ: Գիշերը երկու տղաներն էլ վիրահատության էին ենթարկվել: Նրանց վիճակը կայունացել է, նրանց անջատել են արհեստական շնչառության ապարատից:
Հիշեցնենք, որ թիվ 63 համարի ավտոբուսը պայթել է Երեւանի Հալաբյան փողոցի թիվ 11 շենքի մոտ: Կա երկու զոհ եւ 8 տուժած:
Դեպքի առթիվ հարուցվել է քրեական գործ, նշանակվել են մի շարք փորձաքննություններ: