Ես չեմ կարող կոնկրետ օր ու ժամ ասել, թե երբ ռուսական կողմը կտրամադրի 200 մլն դոլարի վարկով նախատեսված զենքն ու ռազմական նշանակության գույքը: Այս մասին այսօր՝ մայիսի 6-ին, ԱԺ-ում լրագրողների հետ զրույցում նշել է ԱԺ Պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանը:
Նրա խոսքով խոսքը ոչ թե օրենքի այլ համաձայնագրի մասին է, որոնց հետ կապված կոնկրետ ժամկետներ, գործողություններ կան նախատեսված:
«Ես չեմ կարող կոնկրետ օր ու ժամ ասել, թե երբ ռուսական կողմը կտրամադրի, ուղղակի պետք է վստահ լինել, որ համաձայնագրով նախատեսված պարտավորությունները երկու կողմերը կիրականացնեն սահմանված ժամկետներում եւ կարգով»,-ասաց նա:
Դիտարկմանը, որ այս ընթացքում Ռուսաստանը զինում է Ադրբեջանին եւ զենքի օգտագործման հմտություններ սովորեցնում նրանց, Կորյուն Նահապետյանը հիշեցրեց, որ հայկական կողմն այդ մտահոգությունները հնչեցրել է ԱԺ-ում ռուս գործընկերների հետ հանդիպման ընթացքում: «Բավական սուր քննարկումներ են ընթացել, ՀՀ ԱԺ պատգամավորները ներկայացրել են հայկական կողմի դիրքորոշումները եւ դրանց մի մասը վերաբերում էր նաեւ Ռուսաստանի կողմից Ադրբեջանին զինելուն, հարձակողական բնույթի զենք վաճառելուն: Մեր գործընկերները լսեցին մեր մտահոգությունները, նաեւ համատեղ նիստի արդյունքներով մենք ներկայացրել էինք համատեղ հայտարարության նախագիծ: Այս պահին ռուսական կողմը դեռ շարունակում է քննարկել իրենց խորհրդարանի ներքին ընթացակարգերի համապատասխան: Հուսով ենք, որ կարճ ժամանակահատվածում կլինի արձագանք»:
Նա ընդգծեց, որ այդ հանդիպումը տեղի է ունեցել ապրիլի 15-ին: «Պաշտոնապես ուղարկել ենք հայտարարության նախագիծը: Աշխատանքային կարգով ճշտել ենք, որ ՌԴ Դաշնային խորհրդի երկու հանձնաժողովներ Դաշնության խորհրդի նախագահի հանձնարարությամբ ուսումնասիրում են, որի արդյունքում կհրապարակեն իրենց մոտեցումը»,-ընդգծեց նՆահապետյանը: