Բրյուսելում հետաքննության շրջանակում վերականգնել են մարտի 22-ի ահաբեկչությունների ժամանակ իրադարձությունների ընթացքը, հայտնում է DH.be–ն:
Քննչական գործողություններին մասնակցել է այդ գործով կասկածյալ Մոհամեդ Աբրինին, հայտնել է Բելգիայի Դաշնային դատախազությունը: Գերատեսչության ներկայացուցիչների խոսքով ռեկոնստրուկցիան անցել է առանց միջադեպերի, սակայն դատախազները հրաժարվել են մանրամասներ հայտնել՝ քննության շահերից ելնելով:
Իրադարձությունների փուլային ռեկոնստրուկցիան սկսվել է մայիսի 19-ին: Առաջին քննչական գործողությունները անցկացվել են Մաքս Ռոոսի փողոցում՝ Շաերբեք թաղամասում, որտեղ ահաբեկչությունների երեք մասնակիցները՝ Մոհամեդ Աբրինին, Նաջիմ Լաշրաուին ու Իբրահիմ Բաքրաուին նստել են տաքսի, որպեսզի հասնեն Բրյուսելի միջազգային օդանավակայան:
Հետո քննչական խումբն ու կասկածյալը ուղեւորվել են օդանավակայան, որպեսզի վերականգնեն իրադարձությունների ընթացքը հենց սպասասրահում:
Ահաբեկչությունները Բրյուսելում իրականացվել են մարտի 22-ին Զավենտեմ օդանավակայանում ու մետրոյի «Մաալբեկ» կայարանում: Զոհվել էր 35, վնասվել ավելի քան 300 մարդ: Մետրոյում պայթուցիկ սարքը գործի էր դրել Խալիդ Բաքրաուին, իսկ օդանավակայանում՝ նրա եղբայրը՝ Իբրահիմը: