Բրյուսելի օդանավակայանում տեղի է ունեցել բրոնզե հուշարձանի բացման արարողությունը՝ նվիրված 2016 թվականի մարտի 22-ի ահաբեկչության զոհերի հիշատակին, որի ընթացքում 32 մարդ է զոհվել եւ 320-ից ավելի մարդ վիրավորվել: Արարողությանը մասնակցել են Բելգիայի թագավոր Ֆիլիպը, թագուհի Մաթիլդան, Բելգիայի դաշնային կառավարության եւ քաղաքային իշխանությունների ներկայացուցիչներ, փոխանցում է ՏԱՍՍ-ը:
«Այժմ մենք սգալու տեղ ունենք, որտեղ կարող ենք հարգանքի տուրք մատուցել զոհվածների հիշատակին: Հիշել այդ սարսափելի օրը օդանավակայանի ուղեւորների եւ փրկարար ծառայությունների խիզախության մասին»,- հայտարարել է Բրյուսելի քաղաքագլուխ Իվան Մայերը:
Բրյուսելի օդանավակայանի մեկնումների սրահում, որտեղ ուղիղ մեկ տարի առաջ երկու պայթյուն էին որոտացել, զոհերի հիշատակը հարգվել է լռության րոպեով:
2016-ի մարտի 22-ին երկու մահապարտներ Բրյուսելի օդանավակայանում պայթյուններ են իրագործել, իսկ մեկ ժամ անց եւս մեկ ահաբեկիչ եվրոպական թաղամասի Մալբեկ մետրոյի կայարանում ռումբ է պայթեցրել: