Մայիսի 31-ին Տրանսպորտի նախարարությունն ուզում է ամբողջովին շահագործման հանձնել Հյուսիս-Հարավ բետոնե ավտոմայրուղու Աշտարակ-Արտաշատ մի հատվածը: Այս մասին մայիսի 30-ին՝ խորհրդարանում 2015-ի բյուջեի կատարողականը ներկայացնելիս, ասել է տրանսպորտի եւ կապի փոխնախարար Արթուր Առաքելյանը:
Նրա խոսքով՝ 2015-ի վերջին 31 կմ երկարությամբ այդ տեղամասում բացվել է երկկողմ երթեւեկություն, որին զուգահեռ, սկսվել է թեստավորման ռեժիմը: Այն ավարտվել է 2016-ի փետրվարին: Դրա արդյունքում ի հայտ են եկել շեղումներ: Մասնավորապես, առաջացել է սալիկների դրենաժային կարերի ջրամեկուսիչ ռետինը փոխելու եւ բետոնի որոշ ճեղքեր փակելու անհրաժեշտություն:Կառուցապատողը դա կատարել է իր միջոցների հաշվին:
Թեպետ բացումը տեղի կունենա մայիսի 31-ին, սակայն Երեւան-Աշտարակ հատվածում երթեւեկությունը ամբողջովին կբացվի ավելի ուշ՝ հունիսի վերջին, իսկ Երեւան-Արտաշատ հատվածում՝ էլ ավելի ուշ, ինչը պայմանավորված է անասունների եւ գյուղտեխնիկայի տեղաշարժի համար անհրաժեշտ նախապատրաստական աշխատանքներով:
