Հանրապետական կուսակցությունը մտածում է` ոնց պետք է անի, որ առավել ձայն ունենա Գյումրիի ընտրություններում: Այս մասին NEWS.am-ի հետ զրույցում ասաց ՀՀԿ խմբակցության պատգամավոր Սուքիաս Ավետիսյանը, որը Գյումրիի ՀՀԿ տարածքային կառույցի պատասխանատուներից մեկն է:
Գյումրիի քաղաքապետի ընտրությունները աշնանն են, սակայն ՀՀԿ-ում դեռ չեն որոշել` ով է գլխավորելու կուսակցության ցուցակը:
«Առայժմ մենք քննարկում ենք ավագանու կազմի խնդիրները, եւ երբ որ կգա ժամանակը ցուցակը գլխավորելու, նոր կլինեն քննարկումներ եւ տեղում, եւ բնական է նաեւ` կուսակցության համապատասխան մարմիններում»,-ասաց պատգամավորը:
Ասաց` Գյումրիի գործող քաղաքապետ Սամվել Բալասանյանին սատարելու տարբերակները դեռ չեն քննարկել, սակայն ըստ որոշ ՀՀԿ-ականների` ամենայն հավանականությամբ ՀՀԿ-ն ու Բալասանյանի նորաստեղծ «Գյումրեցու ոգի» կուսակցությունը կմիավորվեն, քանի որ իշխանությունը հակված է Բալասայանի թեկնածությանը:
Սուքիաս Ավետիսյանը չբացառեց որեւէ սցենար, այդ թվում` մեր նշածը:
«Ընտրություններում որեւէ սցենար չպետք է բացառել, բայց մենք քննարկել ենք ընդամենը մեկ հարց, որ Հանրապետական կուսակցությունը փորձելու է իր ցուցակով մասնակցել ընտրություններին, թե հետո ինչ կլինի, քաղաքական ուժերի միջեւ ինչ պայմանավորվածություններ կլինեն, հետագայի խնդիր է: Ընտրությունների արդյունքից է կախված, թե ինչ սցենարներ կաշխատեն, դրա համար պետք էընտրություններին լավ պատրաստվել, իսկ արդյունքներից հետո քննարկել համապատասխան սցենարները»:
Մեր հարցին, թե հաշվի առնելով վերջին` սահմանադրական հանրաքվեի ժամանակ Գյումրիում իշխանության պարտությունը, մտավախություն չունե՞ն, որ նույնը կկրկնվի քաղաքապետի ընտրություններում, պատասխանեց. «Գյումրին երբեւիցէ` ընդդիմադիր քաղաք չի եղել ոչ մի պարագայում: Ոչ թե իշխանություններին է դեմ Գյումրին, այլ ուղղակի, որ պրոբլեմները շատ են, քան միջին հաշվով հանրապետությունում, դրա համար ժողովրդի մոտ դժգոհությունը իշխանությունների նկատմամբ բնական է, բայց չի կարելի ասել, որ ընդդիմադիր քաղաք է»,-նշեց նա:
Սուքիաս Ավետիսյանը հրաժարվեց պատասխանել հարցին, թե արդյո՞ք Բալասանյանին հաջողվել է այս տարիներին մեղմել իշխանության հանդեպ դժգոհությունը, որպեսզի կարողանա ստանալ անցողիկ քվե:
