Միջազգային Կարմիր խաչի միջազգային կոմիտեի երեւանյան գրասենյակը երկխոսություն է վարում Ադրբեջանի իշխանությունների հետ հայազգի ռազմագերիների եւ ադրբեջանական գերության մեջ հայտնված քաղաքացիական անձանց շուրջ: Այդ մասին NEWS.am-ի թղթակցին հայտնել է Կարմիր խաչի միջազգային կոմիտեի (ԿԽՄԿ) հաղորդակցման ծրագրերի ղեկավար Աշոտ Աստաբացյանը:
Մեկնաբանելով հայ գերի Մանվել Սարիբեկյանի մահվան տեղեկատվությունը՝ նա նշել է, թե ներկայացուցչությունն այս պահին ունի այն տեղեկությունները, ինչ տարածում են ադրբեջանական լրատվամիջոցները: «Այս փուլում ես ոչ մի նոր բան չեմ կարող ասել: Մենք Ադրբեջանի իշխանությունների հետ բանակցում ենք ոչ միայն այս դեպքով, այլեւ մյուսների հարցով»,- ասել է նա:
Հարցին, թե, արդյոք, ԿԽՄԿ ներկայացուցիչները հանդիպե՞լ են Սարիբեկյանին՝ Աստաբացյանը նկատել է. «Մենք դիմել են ադրբեջանական կողմին, բայց թույլտվություն չենք ստացել»: Նա նաեւ հրաժարվել է մեկնաբանել տեղեկությունները, թե Սարիբեկյանին այսօր պետք է հանձնեին հայկական կողմին:
Ինչպես արդեն հայտնել է NEWS.am-ը, ադրբեջանական լրատվամիջոցների եւ պաշտպանության նախարարության կողմից «դիվերսանտ» որակված Մանվել Սարիբեկյանը, Բաքվից ստացվող լուրերի համաձայն, ինքնասպան է եղել:
Հիշեցնենք, որ Սարիբեկյանը ձերբակալվել էր սեպտեմբերի 11-ին Ադրբեջանի եւ Հայաստանի զինված ուժերի շփման գծում: Ադրբեջանական ոկղմը նրան հայ դիվերսանտ էր որակել, իսկ ձերբակալումից քիչ անց ANS հետուստաալիքը ռեպրտաժ էր ցուցադրել, որտեղ Մանվել Սարիբեկյանը խոստովանում է, որ «Ադրբեջանի տարածքում դիվերսիոն գործունեություն անցնելու պատրաստություն է անցել»: Այդ հոլովակը հայտնվել է նաեւ YouTube-ում:
Հայաստանի պաշտպանության նախարարության տվյալներով, Մանվել Սարիբեկյանը մոլորված հովիվ է եղել, իսկ նրան «որպես հայ դիվերսանտ ներկաայցնելու փորձերը ադրբեջանական քարոզչամեքենայի հերթական պարզունակ քայլն է»: ՊՆ-ն նշել էր նաեւ, որ տեսահոլովակի փորձաքնությամբ երեւում է, թե այն նկարվել է հոգեբանական եւ ֆիզիկական ճնշումների, հատուկ միջոցների կիրառմամբ: