![](img/news/33/36/05/default.jpg)
Ռուսաստանն ակնկալում է Թուրքիայի ու Ուկրաինայի արտգործնախարարների մասնակցությունը Սոչիում՝ Սեւծովյան տնտեսական համագործակցության կազմակերպության ( ՍՏՀԿ) երկրների արտգործնախարարների խորհրդակցությանը, ու պատրաստ է երկկողմանի բանակցություններ վարել Թուրքիայի արտգործնախարարի հետ, եթե վերջինը համաձայնի մասնակցել խորհրդակցությանը: Այս մասին հայտարարել է Ռուսաստանի արտգործնախարարի տեղակալ Վասիլի Նեբենզյան, փոխանցում է «ՌԻԱ Նովոստին»:
«Մենք հրավիրել ենք բոլոր նախարարներին ու սպասում ենք բոլորին՝ այդ թվում Թուրքիային ու Ուկրաինային, բայց առայժմ պատասխան չկա: Ես կարծում եմ, որ այս շաբաթ, առավելագույնը հաջորդ շաբաթվա սկզբին, հասկանալի կլինի (թե ով կմասնակցի)»,- ասել է նա:
Նեբենզյան պարզաբանել է, որ ՍՏՀԿ նախարարների խորհրդի ձեւաչափը չի նախատեսում երկկողմանի հանդիպումների անցկացում, քանի որ դա բազմակողմանի հարթակ է:
Այդուհանդերձ, նա ենթադրում է, որ եթե Թուրքիայի նախարարը ժամանի Սոչի խորհրդակցությանը մասնակցելու, ապա «կցանկանա խոսել մեր արտգործնախարարի հետ»:
«Եվ նման հնարավորություն կլինի՝ մենք ոչ մեկից չենք փախնում, չենք թաքնվում, բոլորի հետ խոսում ենք ու այդ իմաստով բաց ենք ցանկացած խոսակցության համար»,- հավելել է Նեբենզյան:
ՍՏՀԿ-ի կազմում Սեւ ծովի ու Բալկանյան թերակղզու տարածաշրջանի պետություններն են: Արտգործնախարարների խորհրդակցությունը կանցնի հուլիսի 1-ին Սոչիում: